U Bah Paul Lyngdoh Adviser sha ka Tnad Social Welfare hynne ka sngi (20.11.2025) u la iathuh ba hadien ba la pynlong ia ka Meeting bad u SP jong ka Anti-Narcotics Task Force (ANTF) ban iatai halor ka jingjyllei ki nongdie bad nongdih drok ha ka Jylla, u la ong ba la i donkam ban iatreilang bad ki bor Pulit, ANTF bad ki Dorbar Shnong na ka bynta ban rat dyngkhong ia utei u jingdih pynbuiad.
U Bah Paul u la iathuh ruh ba ki Volunteer jong ka Shnong ne ka VDP ki long kiba kongsan ban don ha man la ki shnong na ka bynta ban wanrah ia ka jingshngaiñ bad ka jingioh jingtip ha man la ki dong.
Haba ioh ban iakren ia ka jingkiew ki nongkhaïi Drok ha ka Jylla, u Bah Lyngdoh u la ong ba ka Mawlai ka la dei lypa ka jaka ba jyllei bad iaid ïew bha utei u jingdih ha kaba la ioh ruh ia ka khubor ba ki nongdie ki pyndonkam da ki khynnah rit naka bynta ban shalan ne pynpoi ia u Drok ha ka kti jong ki briew.
Shuh shuh u la ong ba ka Shillong kaba dei ka Nongbah jong ka Meghalaya bad ka East Jaintia Hills District ki dei ki jaka ba iohlad ki briew ban pynrung ia u Drok ha ka Jylla.
Namar ka jingshim kabu jong ki briew ban pyndonkam ia ki khynnah rit, u Bah Paul u la ong ba ka Tnad Social Welfare ka don ia ka jingiakynduh lang shisien shibnai na ka bynta ban iathir ha kaba iadei bad kane ka mat bad rah ruh sha kiwei pat ki Tnad na ka bynta ban iakhun ia kane ka jingsniew.
