U ma Sniawbhalang Dhar uba dei u Symbud Myntri Rangbah ka sorkar jylla mynta ka sngi Thohdieng ula leit jurip ïa ka Mini Secretariat jong ka ‘West Block’ ha Jowai (PWD), ha kaba ula lap ba ka kam mynta kala ïaid bha shakhmat la kumba 90%+ bad kaba sah ka long satang ki kam pynjlih (Finishing).
Ha kane ka sngi la wan ban synran lang ïa u Symbud Myntri da u ma Wailadmiki Shylla uba dei u myntri ka koit ka khiah bad ka kam sports nalor ki ophisar jong ka tnad PWD bad kiwei de.
Ïa katei ka Mini Secretariat jong ka ‘West Block’ la tei haka jinglut kaba 20 klur, ïa kaba la bei pisa da ka sorkar jylla bad kaba sah ka long sa ka ‘East Block’ bad ka ‘North Block’ ïa kiba yn sa pyntrei hadien bala dep ïa ka ‘West Block’.
Ka jingpyndep ïa kane ka Mini Secretariat ha Jowai (PWD) kan ïarap shibun eh ban lait na ka jingkhapniah khamtam ha DC ophis ha Iawmusiang bad shibun ki tnad ophis yn pynkynriah sha kane ka Mini Secretariat bad kane kan pynsuk shibun eh ïa ki paidbah kiba leit donkam. Ula pyntikna ruh ba ïa ka ophis DC kaba don ka Iawmusiang yn pynkylla noh sha ka ïew heh ne ka Shopping Mall, ong u ma Sniawbha.
Ha kane ka sngi la leit jurip ïa ka Working Women’s Hostel kaba dei na ka bynta ka Jaiñtia Hills haka jinglut kaba 27 klur tam ka pisa kaba don hajan ka ophis DTO bad ha kane ka taïew ban wan ka kam kan sdang noh pyntip u ma Sniawbha.
