U ma Sniawbhalang Dhar uba long u Symbud Myntri Rangbah ka sorkar jylla ula pynpaw ka jingsngewkmen halor ka jingïoh ïaroh jong ka tamasa ‘Cherry Blossom’ bala pynlong ha nongbah Shillong na ki briew ba nabar kiba dei ki paralok jong u kum na Mumbai, Hyderabad bad kumjuh kiba na ka ri Spain.
Haba kren sha ki lad pathai khubor u ong kane jingïoh ïaroh ka Tamasa ba dang shu dep pynlong shen ka long halor ka nongrim ‘wat hapdeng ka jingbun briew bad ka jingïashad hapdeng ki shynrang bad ki kynthei naduh ki riew rangbah bad ki khun samla, hynrei kam don pat kino kino ki jingleh khlem akor na ki kam sniew ba bun jait’.
“Kane ka pynpaw kum ki nongïalam ki wan ban ai jingshakri ïa ki paidbah ka jylla Meghalaya bad na ka liang ki paidbah ruh kila kloi ban ïatreilang bad ka sorkar ban wanrah ïa ka akor ka burom bad ka jingïa burom kylliang iwei ia iwei’.
U ma Sniawbha ula ong ‘uwei na ki heh shipai ka Ri ula pynpaw kum kane ka jingshad ba don burom kam ju jia hapoh ki jylla jong ka Ri” bad ka jingai khublei ka long kyrpang eh sha ki paidbah, da kaba u ong ka don ka por ïa baroh ka por ban trei bad ka por ban lehkmen.
