U myntri ka koit ka khiah jong ka sorkar jylla u ma Wailadmiki Shylla ha ka jingkren sha ki lad pathai khubor ula ong ïaka Jowai Nursing College jong ka Ri-Lum Jaiñtia yn tei ha ka Shnong Mukhla kaba la wan shakhmat ban ai ïa ka jaka.
Ïa kane ka Nursing College ha Jowai la kular ban pynïoh da u Myntri Rangbah ka jylla haka jingrakhe ïa ka jingdap 50 snem ka jylla ha kaba ka sorkar kan sanction pisa ïa katei ka jaka pule haka jingheh kumba 4 acre.
U MLA ka Jowai ma Wailadmiki dang shen ula dep khot ïa ka jingïalang hapdeng ka shnong Mukhla bad ki ophisar na ka tnad ka koit ka khiah ban ïakren pynbeit ïa ka jingïasoi soskular (Agreement) na ka bynta ban ïoh phah sha ka Ministry kaba dei peit.
Ha kaba ïadei bad ki jaka pule Doctor hapoh ka jylla, u myntri ula ong haka jingïalam u Myntri Rangbah ka jylla u Conrad K. Sangma mynta ka Shillong Medical College kaba ïoh 50 seat ban pule Doctor bad ka klas kala sdang bad ïa ka Tura Medical College shen yn sa sdang noh ha u snem ban wan.
Kum u MLA na ka por sha ka por ula dawa hapoh ka ïing dorbar thaw aiñ ban wanrah ïa kum kine ki jaka pule kumjuh sha kiwei de ki jaka khamtam shapoh ka Ri-Lum Jaiñtia kaba dang don hapdeng ka jingeh mynta.
Katba ïa ki jingdawa ban pynbun shuh shuh ïa ki Doctor ha ki jaka sumar kum ha Jowai Civil Hospital bad ha MCH Hospital u Myntri ula pynsngew ba ka sorkar kala dep ban thep kam ïa ki 34 ngut ki Doctor bad kala don ka proposal ban thep kam sa kumba 150 ngut ki Doctor kyrmen ba ki jaka sumar baroh hapoh ka jylla kin biang lut ki Doctor.
‘Kaba hakhmat eh ka sorkar kan ïakhun ban pynbha nyngkong ïa ki lai tylli ki Civil Hospital kata ïa ka Shillong, Tura bad Jowai’, la ong u ma Wailadmiki Shylla.
