U Myntri Rangbah ka Jylla, Conrad K. Sangma hynne ka sngi ka 22 Naiwieng 2025 u la plie paidbah ia ka Shlem ai jinghikai ne pule Nurse, ka Care for India (CFI) ha Nonglum Umroi, Ri Bhoi District ha ka jingiadon ryngkat u James Sangma, ki Nongialam jong ka CFI bad kiwei kiwei.
Haba ai jingkren ha kane ka sngi, na ka liang u Myntri Rangbah u la kular bad pynbna ruh ban iatreilang bad ka CFI na ka bynta pynrung ruh ia kiwei pat ki jait ktien ha katei ka Shlem khnang ban long ka jingmyntoi ia ki samla wadkam ha ka Jylla bad ka thaiñ Shatei Lam Mihngi (North East India).
U Sangma u la ai ka jingiaroh ia ka CFI kaba la lah ban pynurlong ia katei ka projek kaba heh kaba la don ruh shibun ki jingmyntoi ia ki samla na ka bynta ban ai ka jinghikai kaba bha tam.
Shuh shuh u la ong ba ka jingpule Nurse lane ka jingpule ha ka liang ka koit ka khiah ka long kaba la kiew bha mynta ha ka Jylla kaba dei ruh kawei na ki lad ioh kam ha kaba bun na ki samla ki la trei shabar. Nalor kata,u la ong ruh ba ka Sorkar ka la wad lad ruh dang shen kumno ba ki samla kin ioh ban leit trei sa sha ka Ri Germany.
