Ka All Jaintia Muster Roll Worker & Labour Union (AJMRWLU) mynta ka sngi ka 22 tarik Naiwieng 2025 ka la pynlong ia ka General Meeting jong baroh ki nongtrei muster Roll kiba trei ha ki tnad treikam bapher bapher kiba don ha ka Sorkar jylla.
Ha kane ka sngi ki nongtrei muster Roll na kylleng ki district ki la wan iashim bynta sha kane ka jingialang ba la khot pynlong da ka All Jaintia Muster Roll Worker & labour Union ha Madan Malki .
Haba kren ha kane ka sngi na ka liang u President ka All Jaintia Muster Roll Worker & Labour Union u Bah Khroo L Pariat u la ong ka Seng ha kane ka jingialang ka la shim ia ka rai ban phah da ka jingthoh sha ka Sorkar ban pyntreikam pura ia ki mat kiba ki nongtrei muster Roll ki dawa ia ka hok jong ki.
Nalor kata u Bah Khroo L Pariat u la ong ba ki nongtrei muster Roll ki dawa na ka Sorkar ba ka por shongthait kan long haduh 65 snem, ban pyntreikam ia ka EPF Employees Provident Fund, kumjuh ban pyntreikam ia ka VDA bad ka Floor Rate naduh 1 tarik bnai Risaw kaba dei shisien shi snem bad kumjuh ia ka VDA 2 sien ha ka 1 snem bad dei ban pyntreikam noh ha ka 10 tarik Nohprah 2025 .
Khatduh u la ong ia kine ki mat baroh ka sorkar ka dei ban pyntreikam noh ha ka 10 tarik December 2025 bad lada ka Sorkar kam pyntreikam ia ki mat jingdawa kin sa shim ia ki rai ban pynlong da ki jingiakhih.
Kumta ki kyrpad ia u Myntri Rangbah ka jylla ba un shimkhia ia ki mat jingdawa jong ki nongtrei muster roll bad ban pyntreikam noh khnang ba kan long ka jingmyntoi ia ki nongtrei muster Roll.
