U President Ka Hynniewtrep Youth Council (HYC ) u Bah Roy Kupar Synrem haba kren sha ki lad pathai khubor ha ka 24 tarik Naiwieng 2025 halor ka jingjia ha Mukroh ha ki 3 snem ba la dep ha kaba 5 ngut ki mynsiem briew ki la duh noh ha ki kuli jong ki Pulit ka Assam Forest Guard lane ki nongtrei jong ka Assam ba peit ia ka tnad khlaw Kiba la siat pathar bad pynlong ia ka jingkhlad noh ki 5 ngut ki nongshong shnong ka shnong Mukroh .
Naduh katei ka jingjia ka HYC ka la dawa na ka sorkar ba ka dei ban shimkhia ba ki briew kiba donkti ban shim ia ka jingim ki nongshong shnong ka Mukroh ki dei ban shah pynshitom katkum ka Ain.
Nalor kata u la ong ba Seng ka la iohi ia ka jingshim rai ka Sorkar Meghalaya bad ka Sorkar Assam ban wanrah da ka Judicial Commission hynrei ka Seng ka iohi ba kine ki jingtohkit jong ka Sorkar kam shim poi shaei shaei ruh. u la ong hadien kane ki 2 ngut ki Myntri Rangbah ka jylla bad kynthup ia ka Asaam bad Meghalaya ki la aiti ia kane ka jingtohkit sha ka CBI ban pynlong ia ka jingtohkit kaba laitluid bad ban pyntikna ba ki briew kiba donkti ban pyniap ia ki nongshong shnong ka Mukroh kin shah pynshitom katkum ki lynti jong ka ain, Hynrei kaba sngewsih ka long ba ha ka 22 tarik Naiwieng 3 snem ka la iaid halor ka jingjia ha Mukroh hynrei ka jingtohkit CBI kim shim la shimkhia bad kim tohkit kumba dei ban tohkit bad haduh mynta kam pat don kano kano ka jingtohkit lane ka jingpynngat kyndon ain ia ki briew kiba donkti halor ka jingkhlad noh ki 5 ngut ki nongshong shnong ka Shnong Mukroh.
Kumta ka Seng HYC ka pynrem jur ia ka sorkar jylla halor ka jingbymshimkhia halor ka jingiap noh ki 5 ngut ki nongshong shnong ka Mukroh.
Kumta ka Seng ka Kyntu ia ka Sorkar jylla ba lada ka la aiti sha ka CBI,ka Sorkar ka dei ban pyntikna ba ka CBI ka dei ban pyndep hok ia la ka kamram bad kan tohkit ia kane ka kam da ka jjnglaitluid , bad kan tohkit ia kane ka kam katkum ka lynti jong ka Ain , ban pyntikna ban pynngat kyndon ia ki Nongtrei jong ka Forest na Assam kiba la siat dusmon bad pyniap dusmon ia ki nongshong shnong ka Mukroh.
Khatduh u la ong ba 3 snem ki la iaid ka jingjia ha Mukroh kim shim la pynklet ia ka Seng bad ka jingkynmaw ka dang sahkut namar ki nongshong shnong ka Mukroh ha ka 22 tarik Naiwieng 2025 ki la duh noh ia ka jingim namar ba ki kwah ban iada ia u pud u sam namar kine ki jingjia ki jia dei namar bym biang u pud u sam hapdeng ka jylla Assam bad Meghalaya .
ka Seng ka buh ka jingkylli ia ka Sorkar sa katno ngut ki dkhot ka jaitbynriew kin duh ia ka mynsiem ha ki kuli jong ki Nongtrei Forest ka Assam bad hato ka sorkar kan shu ailad ia ki nongtrei ka Assam ba kin shu shim ia ka jingim ki nongshong shnong ka jylla.
