Mynta ka sngi ka seng Khooid Ya ka Wah Myntdu (KYMW), ka la pynlong ia ka jingiakynduh bad ki lad pathai khubor ha iing Dorbar Hall ka Chilliangraij Jowai, halor ka mat ban pynduh ia ka jingpyndonkam ia ki plastic, kumjuh ban kyntu ia ka tnat ba dei peit ia ki um ki wah (Water Resources) ban pynlong noh ia ka wah myntdu kawei na ki wah kaba kyrpang.
Mynta ka sngi ha kane ka jingiakynduh jong ki dkhot ka seng la donlang u President ma K. L. Pariat, Vice President ma Bishar Shylla, General Secretary ma Dapher N Suchiang, Finance Secretary ma Oriland Shylla bad Assistant General Secretary ka kong Hunbeitki Dkhar; kine ki dkhot ki long kiba dang shu dep pynthymmai jong ka seng.
U ma Pariat haba kren u la ong ba ka seng ryngkat bad ki bor District ki la shim ia ka rai ha ka jingiadei bad ka jingpynduh pyndam ia ka jingpyndon kam ia ki plastic, da kaba khot lang ia baroh ki paidbah jong ka West Jaintia Hills District ban iatreilang da kaba don ka jingkitkhlieh da lade ia lade hi na ka bynta ka bha ka miat jong ka mariang. U la kyntu ruh ia ka tnat ba peit ia ki um ki wah ba dei ban pynrung ia ka wah Myntdu ha ka Chapter jong ka Environment Social Study.
Na ka liang u ma O. Shylla Finance Secretary, u la ong ba ka seng ka la shim ia kane ka rai naduh ka 5 tarik mynta u bnai bad na ka liang ka seng ka kyrshan pura ia ka rai jong ka bor District ba ka la pynmih ia ka hukum ha kine ki sngi ba la dei ban pynduh pyndam ia ki plastic, na ka liang jong u, u la kyntu jur ia ki paidbah khamtam ia ki nongshongdie jingdie ba kin don ka jingiatreilang bad kane ka jingthmu jong ka seng kumjuh ruh jong ka bor District.
Na ka liang u ma Bishar Shylla u la pynpaw ba kumba long mynta dang don ki lad ban iada ia ka wah Myntdu, u kyntu jur ia kito ki briew kiba sah sha rud jong ka wah myntdu ba ym dei ban bret pathar ia ki nuit ne ki jakhlia kum na ki septic tank, hynrei ki dei ba don ki jaka ba kyrpang, sa kawei ruh u pynkynmaw ia ka wah umkhrah kaba juh long kawei na ki wah kaba khuid ha ki por mynshwa hynrei mynta kam long shuh tang ban pyndonkam ruh, kumta u kyntu ia ki bor ba dei peit ne ka sorkar ba dei ban don ka jingjngai ne ka distance ban shna iing ne tei jingtei sha rud jong ka wah.