Da ki spah ngut ki Dkhot bad nongialam jong ka All Meghalaya Primary Teachers Association (AMPTA) hapoh ka jingialam jong u bah F.C. Shullai, General Secretary bad u Deepak Marak President, ki la leit ban iashim bynta ha ka jingiakhih ia kaba la tip kum ka ‘DHARNA’ ba la pynlong da ka All Primary Teachers Association ha Jantar Mantar, Delhi ban pyrshah halor ka rai jong ka Supreme Court kaba la bthah ia baroh ki Nonghikai ha ka Ri ban pyndep ia ka Teacher Eligibility Test (TET) hapoh 2 snem, kata hadien ba la pynmih ia katei ka hukum (1.9.2025).
Hadien katei ka jingioh khubor ba leit iashim bynta ki Nonghikai na kane ka Jylla, na ka liang u Myntri ba khmih ia ka Tnad Pule Puthi, Bah Lahkmen Rymbui u la pynshai ba ka Tnad bad ka Sorkar kam don jingtip ei ei halor katei ka rai. U Myntri u la pynshai ruh ba dang shen, ka Sorkar ka la kular ban shimkhia ban phah jingthoh sha ka Supreme Court na ka bynta ban bishar biang sa shisien ia katei ka hukum ba la pynmih na ka bynta ki Nonghikai kiba don ha India. Shuh shuh u la pyntikna ruh ba la dep ban bthah ia u AG ban ujor da ka Review Petition sha Supreme Court ha kaba iadei bad katei ka mat iakhih.
“Ma ngi kum ka Sorkar Meghalaya ngi pyrshang ia kaba bha tam na ka bynta ki Nonghikai ka Jylla bad ngi pdiang ruh ia ka hukum ba ai na ki bor ba halor hynrei ia mynta, ngi hap ban iaid katkum ka hukum ba la ai da ka Supreme Court namar ngim pat lah ban rai ei ei. Ngi la pyrshang katba lah ban pynkhih ia ka Sorkar pdeng na ka bynta ban khmih biang sa shisien ia ka jingpyntreikam ia ka NCT regulation hynrei pat ba kan ym ktah ia ka Right to Education (RTE)” ong u Myntri.
