-Iashim bynta ki skul hapoh West Jaintia-
Mynta ka 26 tarik u Naiwieng ka dei ka sngi kaba la pyntreikam ia ka Riti synshar jong ka ri India ne kaba la tip kum Constitution Day, ha kaba ki nongshong shnong ka ri, kila iashim bynta ha ki jaka bapher bapher kum ha ki skul, ki ophis treikam la ka dei jong ki sorkar jylla ne jong ka sorkar Kmie, ki shipai bad ha kiwei kiwei de ki bynta hapoh ka ri India.
Na ka liang ka sorkar Kmie kumjuh lyngba ki sorkar Jylla kila btah ia baroh ki nongshong shnong ban burom ia kane ka sngi. La iohi ha ki skul bad ki ophis treikam bapher bapher ki khynnah skul ne ki nongtrei kila ieng ha ki phyllaw skul ne ki phyllaw ophis jong ki ban pule ia ka Preamble jong ka Indian Constitution.
Ha nongbah Delhi ia kane ka jingrakhe la lamkhmat da ka President jong ka ri ka Drupadi Murmu ha Central Hall jong ka Samvidhan Sadan jong ka Parliament kaba rim. La iadon ryngkat naduh u Vice President ka ri u ba dei ruh u Lamphang ka Rajya Sabha u C.P. Radhakrishnan, u Prime Minister ka ri u Narendra Modi, u Lamphang ka Lok Sabha u Om Birla, ki Myntri sorkar pdeng, ki MP bad kiwei kiwei kila iashim bynta ban rakhe ia kane ka sngi.
Ha nongbah Jowai bad ha kiba bun ki bynta jong ka West Jaintia ruh la ioh ban sakhi ia kiba bun tylli ki skul kila iashim bynta ban pule ia ka Preamble jong ka Constitution ka ri India.
