Ka Kynhun Myntri jong ka Sorkar Jylla (Cabinet Minister) hapoh ka jingialam jong u Myntri Rangbah Conrad K. Sangma hynne ka sngi ka 26 Naiwieng 2025 ka la pynlong ia ka jingialang jong ki Myntri Sorkar ia kaba la tip kum ka ‘Cabinet Meeting’ kaba dei ruh ka jingialang (Cabinet Meeting) ba khatduh mynta u snem 2025 ia kaba la pynlong ha ka sien ba nyngkong eh ha Nan Polok, Shillong.
Hadien ba la pynlong bun jait ki program ha Nan Polok, na ka liang u Myntri Rangbah u la ong ba ka Sorkar ka la sngewdei ban pynlong ia ka jingialang ha katei ka jaka.
Ha kane ka jingialang la iatai, iathir, la rai bad mynjur bun tylli ki mat kynthup halor ka jingpyndonkam bakla bad pathar ia ki Siren, ki ïit ïong ha baroh ki jait Kali. Ka jingthied jaka na ka bynta ban pynheh ia ka Shillong Airport ha kaba la pyllait ruh ia ki Order na ka bynta ban sdang pyntreikam ia katei ka projek. Ka jingthied jaka na ka bynta ban kyntiew ia ka Kam Jngohkai pyrthei na ka bynta ka PPP Project ha ka thain Jongksha bad ha kiwei ki jaka. La rai ruh ban wanrah da ka ‘Service Rules’ na ka bynta ka kam Ialehkai (Sports) ha ka Jylla ha kaba ia kane ka mat ka Meghalaya Sports and Youth Affairs kam pat ju pyntreikam. La rai ban seng ia ka Meghalaya Teacher Training Academy na ka bynta ban kyntiew ia ka Pule puthi. La mynjur ban buh ia ka Park University ha Rilum Garo (Private University). La ioh iathir halor ka jingpdiang jong ki paidbah bad ki Nongrep ban die ia ka Jaka sha ka Sorkar kynthup ia ka Jaka rep kaba don ha ka thain Mawkhanu, East Khasi Hills District (ban pyndonkam na ka bynta ki projek ba bun jait).
Ka kynhun Myntri ka la ioh ban iathir ruh halor ka World Bank Project na ka bynta ban shna ia ki Surok ha ka jingkyrshan lang jong ka Sorkar India bad kiwei kiwei ki mat.
