Ka Federation of Khasi Jaiñtia & Garo People (FKJGP) Central Body ka pynrem jur ia ka jingleh jong ka Shillong Muncipal Board ban khanglad iaki Nongdie sha kiba iaid ban tyrwa sha bad jingbam ha ki bynta jong ka Police Bazar Khyndailad kiba dei ki trai ri trai muluk da ka jingkam ba ki dei ban ioh jingbit shwa na tnad Shillong Municipal board lyngba ki kot ki sla kiba biang.
Katei ka jingleh jong ka tnad Shillong Municipal Board ka long pyrshah iaka hok kamai jakpoh jong ki trai ri trai muluk namar kiba rit ba ria kiba im sngi da kaba shu iaid tyrwa sha kylleng kylleng ka long ka jingiuhroit bad ka jingthombor im im peit peit khlem kano kano ka jingsngew briew.
Lada ka sorkar jylla ka don kano kano ka jingthmu na ka bynta ka bit ka biang jong ki Paidbah kala dei ban pyrkhat sani hashwa ban shim ia kino kino ki sienjam kiba ktah ia ka kam kamai jakpoh jong ki trai ri trai muluk. Katei ka jingleh donbor jong ka tnat Municipal lehse kadei tang ka buit poh ban pynhun iano re iano da kaba ia sylla ban khñiot beiñ iaki longkmie Khasi na ka bynta ka jingmyntoi shimet jongno re jongno.
Kum ka seng kaba ieng ban iada iaka hok jong ki trai ri trai muluk kam lah satia ban shu shong kli kti lane ban shu peitkai halor kine ki jingjia hynrei kan sa bishar bniah ban tih jylliew ia kine kiei kiei baroh ban lap ia ki jingshisha bad na ka liang jong ka seng kan sa shim iaki sienjam ki ban pyntikna ban pynioh pat iaka hok jong ki trai ri trai muluk.
Ha kajuh ka por na ka liang jong ka seng ka maham jur ia kino kino ki tnad jong ki bor sorkar kiba pyrshang ban thombor iaki trai ri trai muluk ha ki dur bula kiba pher bapher na ka bynta ka jingiohnong jong ki briew kiba nabar.
Kane ka long katkum ka jingpyllait khubor na u Kitboklang Nongphlang
Vice-President, FKJGP Central Body.
