U Symbud Myntri Rangbah ka jylla u Bah Sniawbhalang Dhar haba kren sha ki lad pathai khubor mynta ka sngi ka 27 tarik Naiwieng 2025 hadien ba la wai ka jingialang u la ong naduh lashai ka sngi 100 tylli ki truck kiba dei ki trai jylla kin ioh ban kit ia ki Cement ha ka shi sngi na ki Cement Company bad naduh u bnai December ban wan sa 20 tylli ka mut 120 tylli ki truck kiba dei ki trai jylla kin ioh ban kit ia ki Cement.
Nalor kata haba iadei bad ka dor bai kit Cement u Symbud Myntri Rangbah u la ong ba ka Sorkar ka la rai beit ban buh ia ka dor 9 tyngka katkum ka jingshim rai ha ka jingialang kaba nyngkong kaba la long ha ka 13 tarik Naiwieng 2025.
U Symbud Myntri Rangbah u la ong ba na ka liang ki Cement Company ki la kyrpad ia ka Sorkar ban ia pynbeit biang haba iadei bad ka dor 9 tyngka bad na ka liang u Symbud Myntri u la pyntip ba kin sa shong biang ia ka jingialang hapdeng ki Company Cement bad ki truck Association na ka bynta ban ia pynbeit ia ka dor, hynrei u la ong ba hapoh ka jylla ka dor bai kit kan dei beit 9 tyngka.
