Katkum ka kaiphod kaba la phah da u Principal jong ka Jawahar Navodaya Vidyalaya (JNV), Rymbai u Dr. Raj Kumar sha u Deputy Commissioner Cu Chairman ka Vidyalaya Management Committee (VMC), East Jaintia Hills District la iathuh ba napdeng ki 38 ngut ki khynnah skul kiba la sdang kem pang naduh ka 22 tarik mynta u bnai, 11 ngut kila poi ne le wan phai pat sha skul, hadien ba ki la koit na ka jingpang.
Na ka liang jong u Principal jong katei ka skul ul iathuh ba kane ka jingkem pang jong ki khynnah skul ka lah ban dei na ka jingkylla jong ka suinbneng, ha kaba 17 ngut ki khynnah kynthei ha ka 22/11/2025 kila pynpaw ba ki don ia ka jingpang khiehshoh bad jyrhoh. Hadien ba u Principal ula ioh jingtip ia kane ula phah leit noh sha la iing ia kine ki khynnah khnang ba kin ioh ia ka jingsumar jong ki kmie ki kpa. Ha kajuh ka por ruh ban iada ia ka jingsaphriang jong kane ka jingpang sha kiwei pat ki para khynnah skul.
U Principal ula iathuh ruh ba ha ka 23/11/2025 ki don katto katne ki khynnah kiba ujor ba ki don ka jingpang kpoh. Ha kane ka skul ka dong tang kawei ka staff nurse bad tang khyndiat ki dawai dashin, kumta la shuh pynthiang ia ki ha kawei ka Hall jong kane ka jaka pule shipor ban ioh jingsumar.
U Principal ula pyntip ba napdeng kine ki 38 ngut ki khynnah skul kiba kem pang khambun ki dei ki kynthei. Ula iathuh ruh ba naduh ka 25/11/2025 napdeng kine ki 38 ngut 11 kila wan biang sha skul. Ula ong ba napdeng kine baroh ym don kiba poi thiah pang sha ki Hospital bad na kitei ki khynnah kiba dang don hapdeng ka jingsumar ruh mynta kila iohbor.
