Ka Joint Action Committee Muster Roll Worker Union (JACMWU) mynta ka sngi ka 28 tarik Naiwieng2025 ki la wan buh da ka jingthoh sha ka ophis u Myntri Rangbah ka jylla u Conrad K Sangma ban khot iakren noh halor ka jingdawa ki nongtrei muster Roll ka jylla.
Haba kren sha ki lad pathai khubor na ka liang u General Secretary ka JACMWU u bah Bympherlang Lyndem u la ong ba ka Union ka la wan buh da ka jingthoh sha ka ophis u Myntri Rangbah bad kyrmen skhem ba lyngba kane ka jingthoh u Myntri Rangbah un sngap ia kaei kaba ki nongtrei muster roll kiba trei ha ka jylla ki dawa ia la ka jong ka hok ha shwa ka 10 tarik Nohprah 2025.
Nalor kata u Bah Bympherlang Lyndem u la ong lada kam don kano kano ka jingiakren ha shwa ka 10 tarik Nohprah ki nongtrei muster Roll ki la rai ban pynlong da ka jingsahmiet Khristmas habar Secretariat bad kyrmen ba u Myntri Rangbah un sngap ia ka jingdawa ki nongtrei Muster Roll kiba trei ha ka jylla.
Shuh shuh u la ong ki mat jingdawa kiba ki nongtrei Muster Roll ki la pynsngew sha u Myntri Rangbah ki kynthup ia ka Floor Rate naduh u October 2023 haduh 2024 kaba la sahteng bad ki nongtrei muster roll ki dawa ban siew, ka mat kaba ar kadei halor ka rta shongthait ba ki nongtrei muster Roll ki dawa ka long 65 snem, ka mat kaba lai ka dei halor ka EPF (Employment Provident Fund) ba ka sorkar ka dei ban ai ia ka jingsiew hadien ba ki nongtrei muster Roll ki la shongthait bad kan long ruh ka jingmyntoi lada ioh ia ka EPF hadien ba la shongthait na ka kam kum ki Muster Roll bad kumjuh ia ka VDA ba ki dei ban pyntreikam kumba ju pyntreikam namar ka dor jong ki marbam kam pat hiar kumta na ka liang ki nongtrei muster Roll ki dawa ban pyntreikam biang ia ka VDA kumba ju pyntreikam.
“Kumba la rai ha ka 22 tarik ha ka jingialang kaba la long ha Malki lada ka sorkar kam khot iakren hapoh ka 10 tarik Nohprah ki nongtrei muster roll kin shong sah miet Khristmas ha Secretariat la ong u General Secretary ka JACMWU.
