Wahiajer : Mynta ka sngi ka RJTA & JYF ha ka jingialam jong u Paila Kordor Lyngkot, President jong ka RJTA bad u Ma Ombormi L Tariang, President ka JYF ki la ioh ban leit ai jingiarap ia kawei ka long kmie na ka shnong Wahiajer ka ba ia kynduh shibun ki jingeh ha ka jingim jong ka kum ka riew kynthei ka ba don u wei u khun u ba 3 snem ka rta u ba don ka jingpang ha ka met ka phad jong u. Kine ki ar seng ki la iarap ia kane ka long ïing da u khaw bad kiwei kiwei ki marbam ba donkam .
Ha shwa ban ai ia kine ki jingiarap ka la don ka jingialang kaba lyngkot ha ïing kane ka kong. U Paila Kordor Lyngkot haba ai jingkren u la pynpaw ia ka jingkmen ka bakhraw haba ki ioh kum kane ka lad ban kner ia kine ki jingai jingiarap ia kane ka long kmie da ka ba ong ba dei ban ainguh ia U Blei Trai Kynrad ia ki jingkyrkhu ba u la theh sei ha ka jingim jong ngi. Kum ki Seng ki ba peit ia ka bha ka miat ka imlang sahlang ka dei ka kamram jong ngi ban ai jingiarap ia ki ba donkam namar ka kam ka barit ka ba ngi shakri para briew ka dei ka kam ba ngi shakri ia U Blei. U la ong ruh ba wat lada kine ki jingiarap ki long ki barit hynrei ka long pat ka jingkyrkhu ia ki ba donkam shisha ia ka jingiarap bad u la kyrkhu kyrdoh ruh ia une u khun rit jong kane ka kong u ba pang naduh ba dang kha haduh mynta ba u la jan dap 3 snem ka rta, ba un ioh ka met ka phad bakoit bakhlain bad ba un long u khlur ka ri bad ka Jait bynriew ha ka lawei.
U Ma Ombormi L Tariang ha ba kren u la pynpaw ia ka mynsiem ka ba kmen da ka ba ong kane ka dei tang ka jingsdang jong ki kam ai jingiarap, ka Seng kan nang iai trei shitom ban iarap shuh shuh ia ki ba donkam ha kine ki por ki ban dang wan, da ka ba bynrap shuh shuh ba ka long ka jingkyrkhu ia kane ka iing ka ba la mad ia kine ki jingeh.
Pynkut ka khubor ba la phah da u ma Paila kordor Lyngkot, President Ri Loom Jaintia Traders Association.