Ka Hynñiewtrep Integrated Territorial Organisation (HITO) kala pynpaw ia ka jingpyrshah kaba jur halor ka jingthmu jong ka sorkar ban ai jaka ia ka Shree Cement Ltd ban seng ia ka karkhana pynmih dewbilat ha ka shnong Daistong ha ka jaka ba la tip kum ka Khara Siang Lum Pyrshin, kaba hap hapoh East Jaintia Hills District.
Ka seng kala dep ruh ban phah ia ka jingujor sha ka Ministry of Environment, Forest Climate Change ban dawa pynduh noh ia katei ka projek. La pynpaw ba kane ka projek ka ktah jur ia ki jaka rep (Hali/pynthor) jong ki nongshong shnong, ka tynrai jong ki um ki wah, ia ka mariang bad ruh ia ka jingim jong ki trai ri trai muluk jong kane ka thaiñ.
Ka HITO ka la kynthoh jur ruh halor ka jingle jong ka Single Window Agency (SWA) kala la pdiang lymmih ia kane ka company pynmih dewbilat bad ka seng kala kynthoh jur ruh ia u Myntri Rangbah ka Jylla u Conrad K Sangma namar dei ma u khlieh jong kane ka SWA.
Khadduh eh ka HITO kala pynpaw ba da lei lei ruh em kan ym shah ne ailad ba kane ka company kan ioh ban pynjot pynpra ia ka mei mariang bad ia ka kamai kajih lyngba ka rep ka riang jong ki nongshong shnong ka thaiñ. Kala byrngem ba lada ki bor sorkar kin leh donbor ka seng kan ieng rangbah ban iada ia ka hok ki nongshong shnong.
