Ka Mission Director jong ka DREAM (Drugs Reduction, Elimination & Action Mission), Meghalaya, Shillong ka la pynlong ïa ka District Level Meeting halor ka phang Prevention of Drugs ha ka 2.12. 2025, ha ka District Library Auditorium, Mynthong, Jowai. Ka DREAM ka dei ka Mission jong ka Tnat Meghalaya Social Welfare kaba don ka thong ban tei ïa ka “Free Drug Meghalaya”.
Ha kane ka jingïalang ki la ïadon lang u Director ka DREAM bad u Rtd. Officer IPS bah F.G. Kharshiing, ki dkhot ka DREAM, kong D.V. Lyngdoh, Additional Deputy Commissioner Jowai, kong Y. Najiar, District Social Welfare Officer Jowai, kong D.G. Kharshiing, Secretary District Legal Service Authority WJHD, Dr. J.N. Shullai, Director Mihmyntdu Community Social Welfare Organization (MCSWA), ki NGO, ki rangbah Elaka, ki rangbah shnong bad ki nongmihkhmat na ki shnong ha Jowai, nalor ki bor pulit bad ka tnat pule puthi.
U bah Kharshiing u la batai shaphang ka thong treikam jong ka Mission bad u la pynsngew biang ïa ka jingkular ban pyrshah meg ïa ki jingeh kiba mih na ka jingdih pynbuaid. U la kyntait ba ka jingdih drok ka dang dei ka jingma kaba jur ha ki shnong ki thaw, bad ka dei ka por ba donkam tam ban pynlong ki lad jingpynthut, ki jingai jingtip lyngba ki programme jingpynsngew paidbah bad ka jingïatreilang.
Hadien kata, la don ruh ka jingïakren lyngkot ha kaba ki nongïashim bynta ki la pynpaw ïa ki jingeh, ki jingai jingmut bad ki lad ïa treilang ban pynkhlaiñ shuh shuh ïa ki lad jingpynthut ïa ka jingdih drok.
