Ka Meghalaya People United Front (MPUF) ha ka 3 tarik Nohprah 2025 ka la wan pyntip paidbah sha ki lad pathai khubor ba ki la ioh ia ka jingbishar hok na ka Ïingkashari District Session Court, East Jaintia Hills Khliehriat, ha kaba iadei bad ka jingpynngat Mukotduma ki Pulit ka East Jaintia Hills, Lad Rymbai Outpost.
Haba kren sha ki lad pathai khubor na ka liang u President u Bah D. Wanmi Laloo u la ong ka Īingbishar District Session Court, East Jaintia Hills Khliehriat ka la ai ia ka jingbishar hok bad pynksan ia ki dkhot ka MPUF ha ka 12 tarik Naiwieng 2025 halor ka jingshah pynngat mukotduma ha ki Pulit ka East Jaintia Hills halor ka jingshah kynnoh donkti khaii masi khlem ki sakhi Satar kiba biang bad ka Court ka la pynksan ia ki dkhot ka MPUF ha ka 2 tarik Nohprah 2025.
Nalor kata u Bah D Wanmi Laloo u ai khublei ia ki Ïingkashari kaba la ai ia ka jingbishar hok ki nongiasaid Aiñ kiba la pynioh ia ka jingbishar hok haba iadei bad kane ka case number 172/2019.
Shuh shuh u la ong ba ka jingiakhun ia kane ka mukotduma ka la iaid mynta la 5 snem ei ei bad shibun ki jingeh ki iakynduh ha kaba iakhun ia kane ka Mukotduma bad ha ka 2 tarik Nohprah 2025 ka ïingkashari ka la ai ka jingbishar hok da kaba pynksan ia ki, ong u President ka MPUF.
