-La sam ia ki prize sha ki nongjop-
Ka Seng Kur Dkhar East Jaiñtia Hills District mynta ka sngi ka 5 tarik u bnai Nohprah 2025 ka la ïoh biang ïa ka lad ban pynkhalai ïa ka nusib Lucky Draw kaba lah dep ban pynkhalai naduh ka 28 tarik u bnai Risaw 2025.
Kane ka jingpynkhalai biang ïa kane ka nusib Lucky Draw ka dei hadien ba ka jingmih na ka jingbympdiang u paidbah ïa ka second prize jong ka Lucky Draw ha kaba ïa kane ka second la shim ne jied da u Ma Justin Dkhar uba dei ruh u adviser jong ka Seng Kur Dkhar, ki paidbah ki kynnoh ba ka don ka jingleh thok ha kane ka second prize bad ka video ka la saphriang sha ki social media bad ong ba u Bah Justin u la leh thok ïa kane ka Prize.
Mynta ka sngi na ka liang u Bah Justin Dkhar uba dei ruh u Adviser jong ka Seng Kur Dkhar u la ong ba u khlem don jingthmu ban leh ïa kane ka kam bad ka daw kaba pynlong ïa u ban buh ïa ki kti shapoh ka pla ka jong u ka dei na ka daw ka jingkhriat palat ka aïom tlang bad na ki daw ba u khlem ïoh thiah bha ha ki ar sngi na ki daw ban pynkhreh ïa fete kaba la long kumba ar sngi lynter. Halor kane u Bah Justin u la panmap ruh na ki Paidbah ba bun ba lang, ki kur ki kha, ki hynmen ki para, ki kur ki jait ban map noh ïa u shisyndon bad kane kan long ruh ka jingsneng na ka bynta ka jong u.
Ïa ka second prize la ïoh ban pynkhalai biang sa shisien ha ka shnong Mookhep ha ka jingsakhi ki heh jong ka kur, ki police department bad kiwei de ki para kur bad ki paidbah kiba wan ban sakhi sha kane ka jing pynkhalai biang ïa ka second prize.
Ha kane ka prokram, na ka bynta ban shim ia ka slip na ka bynta u/ka nongjop ia katei ka prize la aiti bad iashaniahlang ha u Ma Riborlin Shylla, bad u number uba pom ia katei ka 2nd prize u dei: 21385. Ka prize ka dei ka Bolero Pickup. Kum ban shu pynkynmaw biang, kiwei pat ki number lucky draw, ba lah pom, ia kiba lah dep pyniakhalai ha ka 28.11.2025, ki long 1st Prize: 14482 (Ka Jimmy Top Model); 3rd Prize: 81930 (Scooty Yamaha); Consolation Prizes: 80855; 99390; 23068; 71607; 110957, kiba ka prize jong ki ka long mar Rs. 5000/- kawei.
Ha kane ka juh ka sngi, la sam ruh da kitei ki riew rangbah ia ki prize jong ki lucky draw jong ka seng kur, sha kiba jop ia ki. Ia ka 1st prize, la jop da i kong Dabiang Lyngdoh, Rangang; 3rd prize, da u Mekilari Sympli, Latyrke. Katba ia ka 1st bad 2nd Consolation Prize pat, la jop da u Bankitbok Shadong, Chiehruphi bad u Bhamon Dkhar, Iongkaluh. Ia kiwei pat ki prize ba dang sah yn sa sam mardor hadien ba lah don kiba wan kam ia ki bad ia kine ruh yn sa pyntip paidbah.
Kane ka long kat kum u kyrwoh khubor ba la pyllait da u Teras Dkhar, President bad u Besterwell Dkhar General Secretary jong ka, Seiñ Kur Dkhar East Jaintia Hills District.
