U Bah Fidelis Mukhim uwei na ki Rangbah jong ka Balang Katholik Mookhangkhla ha ka jingpynlait Khubor hynne ka sngi ha Jowai la ong ba ka Parish Iongshiwiat, Diocese Jowai kan pynlong ia ka jingiaseng Proseshon Iukharist ha kane ka 14 tarik Nohphrah 2025 ha ka Balang shnong Mookhangkhla ha ka juh ka por kan rakhe Jubili ruh ia ka jingdap sanphewsnem ka Iingmane Dewbilat bathymmai kaba heh bad kaba itynnat jong ki.
Ka Jingknia Mass Iukharist paidbah kan sdang ha ka por 10 baje mynstep ( 10.00 AM) ha kaba u Most.Rev. Ferdinand Dkhar D.D,Bishop ka Jowai Diocese u kongsan ha baroh ki jinglehniam ha ryngkat ki Lyngdohsohblei kiba wan napoh ki Parish jong ka Diocese bad nabar.
La ong ruh ba ka jingiaid proseshon Iukharist kan sdang ha ka por shibaje (1.00 PM) nohphaisngi.Kum ban shu pynkynmaw ka shnong Mookhangkhla ka don hapoh ka Parish Iongshiwiat ha ka surok by Pass Nartiang- Moolasnai-Umroi kaba jngai tang kumba 10 Kilomitre eiei na ka Shnong Nartiang West Jaintia Hills District. Ban pynkhraw ia kane ka jingiaseng proseshon Iukharist bad ka jingrakhe Jubili ia ka Iingmane jong ki la khot la wer ia ki Parabangeit na ki Parish bapher bapher jong ka Jowai Diocese bad ia kiba nabar ban iawan shongshit sha kane ka proseshon bad rakhe Jubili jong ka Iingmane ka shnong Mookhangkhla.
U bah Fidelis Mukhim u ong ruh lah ban poisuk sha ka shnong Mookhangkhla naba u surok rong uba heh bad uba bha.
