Mynta ka sngi ki bor pyniaid District jong ka East Jaintia Hills District kila pynmih ia ka hukum ba la soi da u Deputy Commissioner jong kane ka District na ka bynta ban pyntrei kam ia ka dor bai kit Cement kaba dei Rs.9/- shi Matric Ton ha ka shi KM.
Baroh ki Cement Company ki hap ban siew ha ka dor Rs.9/- (Khyndai tyngka) shi MT. shi KM, ia ki trok kiba la buh ha ka thup jong ki Heavy & Medium Goods Vehicles (Diesel) bad kane ka dor kan long na ka bynta ka jingiaid ha ki surok rong ne ki Black Top Road, la pynpaw ha kane ka hukum kaba la soi da u DC ka East Jaintia Hills District ha ka 5 tarik mynta u bnai 2025.
Kum ban shuh pynkynmaw ba kane ka dei ka dor kaba na ka liang ki Trai bad Draibar Trok hapoh ka lama jong ka Meghalaya Commercial Trucks Owners & Drivers Association (MCTODA) kila dawa ban siew da ki Karkhana pynmih Cement. Ha ka jingialang ba la lum da ka sorkar jylla kala sngewdei ban pyntreikam da katei ka dor bai kit kaba Rs.9/- shi MT shi KM ban siew da ki Company pynmih Cement.
