-Shen yn ioh MRI ha Jaintia ong u ma Wailad, Health Minister-
Ka Jaiñtia National Council (JNC), Western Zone hapoh ka jingialam u President jong ka u Hamehi Bamon bad u General Secretary Sambormi Susngi ki lah leit ban ia kynduh bad ka Dr.J.S. Momin Director of Health and Services (MI) bad lah ai ruh ryngkat bad ka dorkhas halor ka phang ban dawa ban pynbiang iaki nongtrei haki CHC bad PHC khamtam iaki doctor specialist ba dei peit iaki kynthei (Obstetricians and Gynaecologists) khnang ba kin lah ban ai iaka jingsumar haki CHC namar ki jaka sumar kum ka OT ki lah don lypa bad ruh iaki doctor khynnah (Paediatricians) bad ban pynbun ruh iaki doctors bad ki staff, ki nurses.
Ka seng kala dawa ruh ban pynbiang iaki dawai bad ki test katkum ka juk mynta kum ki (X-ray), ki Test Snam, ki USG bad kiwei kiwei ki jait test kiba iahap bad ka juk ba mynta khnang ban pynsuk ia u Paidbah ban leit bad wad shaki jaka sumar ki riewshimet (private).
Ka seng haka jingiakren bad i DHS, ka Dr.J.S. Momin ka la ong baki kwah ban thung ia ki Doctor kiba dei specialist jong ki kynthei ha man la ki CHC bad PHC hynrei na kadaw ba duna palat kiba pule ia kane ka laiñ, na kata ka daw ki shem jing eh, “Hooid, mangi ngi pynbiang katba lah haki District Hospital kum ka MCH bad kiwei, katta ruh ki don ki Doctor kiba la phah pule diploma sha Chennai kumba hynriew bnai bad ynda ki lah dep kin sa phah ia ki sha FRU ( first refusal unit) bad sha ki CHC, PHC, kine kim dei ki specialist hynrei ki lah ban iarap ia ki Case kha khun bad kiwei” ong ka DHS.
Ka la ong ruh ba lada duna ki dawai dashin, ha ka jingshisha dei ban pan daki ba dei peit jong ki CHC bad PHC na ka MMDSL (Meghalayan Medical Drugs and Services Limited), bad naka bynta ki jingtest bapher bapher pat kin pyrshang ban leh katba lah ban pynbiang.
Ka seng hadien kane, ka la leit ban ia kynduh ruh bad u Minister jong ka koit ka khiah u ma Wailadmiki Shylla, bad la ai ruh ka juh ka jingthoh.
U lah ong ba katkum ba long mynta ki la sdang ban thep Doctor kumba 150 ngut ban pynrung sha ki CHC bad PHC, bad na ka liang ki dawai (Medicines) ba juh duna ruh bad ki tiar test (Equipment) bad kiwei kiwei ia kane ruh kin sa pynbiang kin sa peit pyrman bha bad u la ai ruh ka khubor ba bha ba iaka MRI test yn sa pynioh shen ha Jaiñtia bad ia kane ruh ki la iakren ka kawei ka company ka ban pynpoi iaki tiar ki tar jong ka MRI bad iaka jaka ruh lah dep ban pynioh, ong u Minister ka koit ka khiah.
