Ka KSU Khliehriat Circle ryngkat bad ka Association ki nongrep jong ka Elaka Nongkhlieh, East Jaintia Hills District mynta ka sngi ki la ioh ban pynpaw iaka jingpyrshah da kaba buh dorkhas halor ka Public Hearing ka ban long ha ka 19 tarik mynta u bnai Nohprah 2025 halor ka jingthmu ban tei iaka Shree Cement limited ka ban tei ha ka shnong Daistong, East Jaintia Hills District.
Haba kynduh bad u CEM JHADC Ma Thombor Shiwar ula pynpaw ka jingsngew lyngngoh kumno ba u bar jylla u ioh ban thied jaka hapoh u pud u sam ka District Council ha kaba ka District Council kam don jingtip eiei ia kane bad kane ka pynpaw ba ia ka District Council mynta ka sorkar kam kheiñ snep shuh. Na ka liang ka seng bad ka kynhun ki nomgrep ki la pynpaw iaka jingbynniaw ba lada wan katei ka plant ki umbam umdih kin sa rngat noh bad ki pynthor kba kin jah noh. Na ka liang u CEM u la kular ban tohkit iakane bad lada ka poi sha ka miej ka council yn pynsangeh iakane ka jingthmu.
Ka seng ha ka juh ka sngi ka la ioh ruh ban kynduh bad u DC ka East Jaintia Hills District ha kaba la pynpaw ruh ka jingpyrshah halor ka nongrim ban nym iaid sha khmat iaka public hearing bad na ka liang u DC u la jubab ba iaki jingpyrshah un sa rah iaki sha ka Meghalaya State Pollution Control Board bad ruh sha ka State Environment Impact Assessment Authority ban shim iaka rai ba khatduh.
Ka seng haba kylli ha kaba iadei bad ka jingdie lilam iaka jaka sha kane ka company da uwei u briew ba hato ka sanction la dep approve ne em u DC u la jubab ba ki dang apply iaka sanction bad ka notice haduh mynta ruh ym pat buh hynrei dang hap iaid lyngba ka revenue department ban peit sani. Ka seng ka la pynsngew ba kum kane ka rukom treikam ka long kaba ma namar ka sorkar hi ba don ka jingthmu ban leh donbor ka la beit ban tah sia lieh wat iaki kot ki sla ban iaid beit ka kam. Ka seng halor kane ka kyntu ia u DC ba lada ym pat pdiang approve iaka sanction ban transfer iaka jaka kaba mut iaka public hearing ruh um dei hi ruh ban iaid shakhmat haba tang iaka khyndew ba kane ka plant kan ieng ka don dang hapdeng ka jingiaid lynti.
Ka seng ka kyntu ba ki paidbah nongshong shnong ka Daistong ki dei ban ieng Rangbah bad kim dei ban long kum u Iso haka Bible uba iapeiñ iaka hok longtrai daka jingtah syrwa tang namar ba u thngan. Ka seng ka pynpaw ba kan dang iai don bad ki paidbah jong ka shnong ban pyrshah iakane ka jingthmu jong kane ka cement plant.
