Kumba u ma Sniawbhalang Dhar u la kular ha ka sngi noh Rot jong ka Raij Ialong kaba la pynkut ha ka 07/08/2025 ban iarap pisa ban pynbha bad pynitynnad shuh shuh ia ka jaka noh Rot ne ka Madan Aitnar jong ka Raij Ialong, mynta ka sngi u ma Sniawbhalang Dhar ha ryngkat ka jingsynrang lang bad u MLA ka Jowai u ma Wailadmiki Shylla, kila leit ban jurip ia ka jaka na ka bynta ban ioh pyntrei noh iaka kam.
Mynta ka sngi ki nongialam jong ka Seiñ Raij Ialong hapoh ka jingialam jong u ma Pyrkhat Shylla, President, kila pdiang burom ia kine ki ar ngut ki nongmihkhmat bad kila pynlong ia ka jingjurip ia baroh sawdong ka Madan Aitnar.
U ma Sniawbhalang Dhar ula pynthikna ia ki nongialam jong ka Raij Ialong ba ka kam kan sdang noh ha kine ki sngi ar sngi ban wan bad u kyntu ia ki nongialam ban iadon bynta lang ban peit bad shimkhia ia kane ka jingpyntrei, khnang ba kan long kaba iaid beit iaid ryntih bad kaba jop, na ka bynta ka jingmyntoi ki khun ki hajar jong ka Raij.
Na ka liang jong u ma Sniawbha ula pynthikna ruh ba kane ka jingpynbha bad jingpynitynnad ia kane ka jaka noh Rot ka Raij Ialong kam dei satia na ka skhim sorkar, hynrei ka dei ka jingpynlut kaba mang na ka pla jong u hi.
Kum ban shu pynkynmaw ba kane ka jaka noh Rot Aitnar ka kynthup ia ki khun ka Raij Ialong, Wahiajer bad ka Nongkhyllep.
