Ka Dorbar ki Soo Langdoh kaba la long ha Madan Lariang Ialong, ka dei ka Dorbar katkum ka dustur hikai niam hadien ba la dep ban lum ïa u kba u khaw na ki hali pynthor bad mynta ïa kane ka Dorbar la pynlong mynta ka sngi (14/12/2025). Ha kane ka Dorbar la wan ïashim bynta da ki Nongïalam niam jong ki Soo Raij-Soo Langdoh hapoh ka jingïalam jong ki Saw Seiñraij ba kynthup ïa ka Seiñraij Jwai, Seiñraij Tuber, Seiñraij Chyrmang bad ka Seiñraij Ialong.
Ïa ka Dorbar la pynïaid da u Pator ka Elaka Jwai u waheh Raymond Nartiang, uba la ai ki kyntien lamphang bad ki kyntien pdiang burom. Nangta la ïoh ïa ka jingïakren ïakhana jong ki Soo Langdoh na ka bynta ban pynlong ïa ki Chad Ñiam Behdieñkhlam 2026 hapoh kine ki Raij.
La pyntip da ka Dorbar ba ha Raij Chyrmang ka sngi ban pynkut ïa ka Chad Ñiam Behdieñkhlam jong ka, kan long ha ka 26 tarik April, ha Raij Jwai ha ka 9 tarik July, ha Raij Tuber ha ka 17 tarik July katba ka Raij Ialong kan pynkut ha ka 10 tarik August 2026.
Shuh shuh ha kane ka Dorbar la ïoh ïa ka jingsneng kyntu na ki rangbah jong ka Soo Raij-Soo Langdoh ban wanrah ïa ka mynsiem jinglong kawei, ka jingsngewïajan bad ka jingkyrsiew bad ai mynsiem. La ïoh ïa ka jingkren na u ma O.H. Toi, President Seiñraij Jwai, ma Pyrkhat Shylla, President Seiñraij Ialong, ma Helping Phawa, President Seiñraij Tuber, ma Bichar Talang, Tymmen Raij Talang, Seiñraij Kongwasan Chyrmang bad na u ma Puramon Kynjing, Dolloi Elaka Jwai kum u khlieh ka niam khlieh ka Elaka.
Katkum ka nongrim hikai niam ha kane ka Dorbar hapoh ka jingïalam jong u Pa Dolloi ryngkat bad ki Soo Langdoh bad ki Wasan kila pyndep ïa ka suit ka shor bad ka nguhblei nguhsyiem na ka bynta ban biang ka kam niam, kam raij, kam shnong ha ki por bad ki sngi kiba shakhmat.
La pynshit pynsyaid shuh shuh ïa kane ka Dorbar da ka jingshad sur tynrai ba la shim bynta da ki khun ka Seiñraij Chyrmang, Seiñraij Jwai, Seiñraij Ialong bad ka Seiñraij Iongnoh.
