U Myntri Rangbah ka jylla u Conrad K Sangma haba kren sha ki lad pathai khubor ha ka 19 tarik Nohprah 2025 u la pyntip ba ka kynhun myntri ka la shim ia ka rai ban wan rah jingkylla haba ia dei bad ka pule puthi ha ka jylla.
Na ka liang u Conrad Sangma u la ong ba u kwah ban pyntip sha ki paidbah ka jylla bad khamtam eh ia ki nonghikai Adhoc bad SSA ba ka kynhun myntri ka la mynjur ia ka jingai jingmut ba la ai da ka tnat Pule puthi, ban thaw ia ka structure pay na ka bynta ki Adhoc bad ki SSA khnang ba kin ym neh sah ha ka juh ka jingsiew tulop bad ka jingsiew tulop la pynheh kat kum ka jingslem ban hikai kat kum ka snem ba ki hikai.
Ka sorkar ka la pyniapher kat kum ki snem ba ki hikai. U la ong ba ki nonghikai ki don jingartatien haba ia dei bad ka kam hikai jong ki hynrei ka sorkar ka la shim ia ka rai ba ka kam jong ki kan ym don jingktah. U la ong ruh ba ki nonghikai kin don bynta lang ha ka CPF ha kaba ka sorkar ruh kan don bynta lang khnang ba ha ka por ba ki shongthiat kin don ka pisa kaba kin ioh ban pyndonkam.
U Myntri Rangbah u la iathuh ba ka sokar kan thaw da ka society ba kan peit ia kane ka jingdonkam. Ka sorkar kan sa pyntrei kam ia kane naduh ka 1 tarik u Iaiong 2026 kumba u la kular ha kine ki bnai ba la dep.
U la ong ba ha kine ki lai bnai kin trei bad ha kine ki lai bnai un sa pyntip ia ka jingdon jong ki nonghikai, u la ong ba ki don kato katne ki jingeh bad ia kine kin sa ia pynbeit. Lyngba kane ka rai ki nonghikai kim don kam shuh ban khuslai bad ban wan mih sha ka sorkar na ka por sha ka por.
