Ka Meghalaya People United Front (MPUF) Laskeiñ Block Circle hapoh ka jingïalam jong u Aibanlam Suchiang u ba dei u Sports Secretary, u Vice President u P. Suiam bad u President jong ka Laskein Unit u Nevermine Lyngdoh mynta ka sngi kila leit ai jingïarap ïa ka Kong Balari Suchiang kaba la duh noh ïa ka ïing jong ka na ka daw ka jingshah bam duh ha ka ding ha ka por shiteng sngi ha ka 17 tarik mynta u bnai.
Na ka liang ka seng kala wan ban sngewlem ïa kane ka longiing bad la ai jingïarap ruh da ki tiar ïing ba donkam ryngkat ka song pisa.
Na ka liang u Nevermine Lyngdoh u President ka Laskein Unit haba ai jingkren ula pynpaw ka jingsngewlem bad ula ai ruh ka jingduwai nguhblei ïa kane ka longïing kaba la mat ïa kane ka jingjia ba sngewsih, da kaba ong ruh ïa ki trai iing ba dei ban shaniah ha ka mon jong u Blei, U ba la buh la bynta ia kiei kiei ha ka jingim briew.
Ula kitbok kitrwiang ruh ïa ka iing ka sem baroh ban ïoh ïa ka met kaba shait kaba khlaiñ nangne shakhmat. Khadduh ka seng kala kular ruh ba lada don sa kino kino ki jingdonkam jong ka iing ka seng ka kloi ban kner ïa ka kti jingïarap jong ka.
