Kum shibynta ban kynmaw burom ïa ka Lyngkhuh snem sngi iap ba 163 u Kiang Nangbah ka ban long haka 30 tarik u Nohprah, Ka Khynroo Khyllood Committee Seiñraij Jawai ha kane ka 21 tarik kala pynlong ïa ka jingïakop Dat Mooñiaw (moopoint), tan tyllai bad ka Rah Mookhrah ha Madan Dulong, Jowai.
Ha kane ka jingïakop la wan ban shim bynta da ki khun samla bad ki longkmie na ki dong bapher bapher bad ka jingïakop kala long kaba i shongshit bha ha ryngkat ka jingwan shakhi kiba bun ba lang.
La pynlong ïa kane ka jingïakop kum shi bynta ban khring ïa ki jingmut jingpyrkhat jong ka juk ba mynta khnang ba kin tip shaphang kine ki jait jingïalehkai kiba u Kiang Nangbah u juh sngewtynnad ban pynbyrnia haka por ba u dang khynnah lem bad ki paralok jong u.
Kiba jop haka ïakop Dat Mooniaw jong ki kynthei ki long ka Panaliar A kaba la pynliem ïa ka Panaliar B, katba ha ka liang ki shynrang la jop da ka Loomïongkjam A kaba la pynliem ïaka Loomïongkjam B.
Ha ka ïakop Tan Tyllai ha ka liang ki kynthei la jop da ka Loompyrdi Iongpiah kaba pynliem ïa ka Loomïongkjam, katba ha ki shynrang la jop da ka Loompyrdi Iongpiah kaba pynliem ïa ka Loomïongkjam.
Ha ka jingïakol Rah Mookhrah kila don san ngut ki khun samla kiba la wan ban ïashim bynta ban rah ïa kitei ki Mookhrah kiba don hala ki jong ki jong ki jingkhia, ki ar ngut ki samla kiba la poi sha ka thong ban knieh ïa ka nam jop ki long u Callten Sari bad u William Rymbai.
Ban rai jop ïa ki na ka liang ki nongpynïaid kiba la kheiñ ïa ka por ba rah ïa u Mookhrah uba 107.48 kilo ha ka jingjngai kaba 20 Metre ha kaba u William Rymbai ula lah ban pyndep haka por 42 second, katba u Callten Sari ula pyndep haka por 39 second, kumta u nongrah Mookhrah ba khlaiñ jong kane ka jingïakop la jop da u Callten Sari.
Ka KKC, Seiñraij Jowai kala pyntip haka 26 tarik u Nohprah kin pynlong ïa ka jingïakop Siat Thong ha Madan Madiah Kmaiblai bad kane ka jait jingïalehkai ruh ka dei kawei kaba u Kiang Nangbah u sngewtynnad haka por khynnah samla jong u.
Ha ka juh ka por ka Seiñraij Jowai ka khot ïa ki khun ka Bri u Hynñiewtrep Hynñiewskum ban wan sakhi lang sha ka prokram leh burom ïa ka Sngi Iap ba 163 u Kiang Nangbah, u Khlawait ka Ri Jaiñtia ka ban long haka 30 tarik Nohprah, 2025 ha Madan Mynkoipyrdi Iongpiah naduh ka por 10:00 waje mynstep ha kaba u ma Sanbor Shullai, myntri ba peit ïa ka Art & Culture, Animal Husbandry & Veterinary Department Etc. jong ka sorkar jylla un long kum u kongsan.
