Ka khubor Pulit kaba la phah mynta ka sngi la iathuh ba na ka liang jong u Superintendent of Police ka East Jaintia Hills District u Vikash Kumar, IPS ula kyntu ia ki riew paidbah ba kin iarap ai jingtip lang sha ki Pulit lada ki ioh jingtip ba dang don shuh sa kiwei de kiba donkti ban pynbthei bom IED ha ka jaka trei jong ka Dhar Company kaba don ha shnong Shymplong, East Jaintia Hills District.
Na ka liang ki Pulit kila iathuh ba ia ka kyrteng jong kino kino kiba pyntip yn sa buhrieh bad kim dei ban sheptieng ioh don ba tip ia ki. Ha ka juh ka por ka tnat Pulit kan sa ai buskit ruh ia kino kino kiba ai jingtip ia ka jingdonkti sa kiwei de ha kane ka kam beaiñ.
Kum ban shu pynkynmaw ba kane ka jingjia kala jia ha ka shiteng miet jong ka ka 15 tarik mynta u bnai ha ka por kumba 12:15 baje, ha kaba la don ka jingpynbthei bom IED (Improvised Explosive Device) ha ka jaka trei jong ka Dhar Construction Company hajan ka shnong Shymplong. Ha kane ka jingjia kawei ka trok kit um kala julor, hynrei ym don briew ba mynsaw.
Na ka liang ki Pulit kila register Case ia kane ha Lumshnong Police Station. Ha kaba iadei bad kane la kem ruh ia ki ar ngut ki briew na ka shnong Shymplong ba la tip kyrteng u Richard Suchen ba 31 snem ka rta bad ia u Pynshaitbor Syih ba 45 snem ka rta.
Na ka jingtohkit ki Pulit la ioh jingtip ba don sa u wei u briew ba tip kyrteng u Smiki Tongper uba na ka shnong Shymplong hi uba la plan ia kane ka kam ryngkat kitei ki ar ngut lem bad kiwei kiba suba ba ki dei ki dkhot jong ka seng kieng atiar ba la shah niew beaiñ ka HNLC. Utei u Smiki u dei ruh uba la don case teng ha Khliehriat Woman Police.
Ha ka jingleit khynra jong ki Pulit ia ka iingsah u Smiki Tongper kila ioh ban kurup ia ki tiar pynbthei kynthup ia ki fuse, ki detonator, ki gun powder, ki splinter, kawei ka suloi shna hi bad ar tylli ki handset (make-BAOFENG)
