(M.M.Thaiang)
U Phadar Rev. Augustine Lamin, Parish Priest ka St Theresa Parish Jowai ha ka jingpyllait Khubor hynne ka sngi, u la ong ba kiwei kiwei ki Diocese kin buh la ka sngi ban pynkut ia ka jingrakhe Jubillee bakhraw 2025, katba ka Jowai Diocese pat kan pynkut ia kane ka jingrakhe Jubillee bakhraw 2025 da ka Proseshon bah jong ka Diocese bad ka jingpynkyntang Lyngdohsohblei (Lyngdohniam) ia u Deacon Sambha Kyndait ha kane ka 28/12/2025 ha Jowai.
La ong ruh ba ka Mass Iukharist bad ka jinglehniam pynkyntang Lyngdoh kan sdang naduh ka por khyndai shiteng mynstep (9.30 AM). U Most Rev. Ferdinand Dkhar D.D. Bishop ka Jowai Diocese u long u kongsan ha baroh ki jinglehniam ha ryngkat ka jingiasynran lang ki Lyngdohsohblei na ki Parish bapher bapher jong ka Diocese bad kiba nabar ka Diocese.
Ban pynkhraw pynphuh pynphieng ia ka jingpynkut ia ka jingrakhe Jubillee bakhraw, ia ka Proseshon Iukharist bad ia ka jingpynkyntang Lyngdoh ia u Deacon Sambha Kyndait, u Lyngdoh Sohblei uba nyngkong eh ba ka Balang shnong Mihmyntdu ka la pynmih, la kyntu ia ki para bangeit napoh ka Diocese, ia kiba na ka Archdiocese Shillong, Diocese Nongstoin bad ia ki paradoh parasnam ka Bri u Hynniew Trep ban ia wan shongshit ban pynkhraw ia kane ka sngi.
Ka Proseshon Iukharist kan sdang ha ka por shibaje nohphai sngi (1:00 PM) ka ban sdang na Madan Skul Marianhill Higher Secondary School bad wanphai ban pynkut ha kane ka juh ka Madan. Ka Iingmane bah (Cathedral) jong ka Diocese kaba dangiaid ha ka jingtrei ban pyndep, ka long kawei na ki Iingmane kaba heh, kaba itynnat bad kaba khring ym tang ia ki para bangeit bad kaba khring ruh ia shibun ki Nongwan jngohkai pyrthei napoh ka ri kiba wan jngoh ia kane ka Iingmane bah (Cathedral) jong ka Diocese.
