Ki paidriewngeit jong ka Balang Katholik Jowai kum ka dak ka jingkynmaw bad ka ka jingpynkhreh ban pynkut ia ka jingrakhe Jubilee bakhraw 2025 ka jingkha ia u Jisu Khrist sha kane ka pyrthei, da ki hajar ngut ki paidriewngeit ki la iatuid sha St. Theresa Parish ban rakhe ia kane ka sngi (sngi Khristmas) bad ia shim bynta ha ka jinglehniam.
Ha ka por shiphew baje mynstep la don ka jingknia Mass Iukharist bakhuid kaba lamkhmat ia ka jinglehniam da Most. Rev. Ferdinand Dkhar D.D., Bishop ka Jowai Diocese kaba la synran da u Sohblei Rev. Fr. Augustine Lamin, Acting Parish Priest jong ka St.Theresa Parish, Jowai.
U Bishop Ferdinand haba kren ha kane ka sngi u ong, U Blei u long ka jingieid namar ba u ieid ia ki briew kiba dei ki jingthaw u phah iala u khun ba marwei jong u, u Jisu Khrist ban wan longbriew sha kane ka pyrthei ban pynim ia ki khun bynriew. U ong, u Jisu Khrist u long ka jingieid, ka jingshai, ka Mluh, ka lynti ban ialam ia ki khun bynriew sha u Blei. Nangta u ong “Khristan” ka wan na ka ktien Khrist kaba mut ki Nongbud u Khrist bad haba long ki nongbud u Khrist, ki khristan ki dei ban long ka jingshai hapdeng ka jingdum, ka Mluh kaba bang hapdeng ka jingblat bad ka lynti ban ialam ia kiwei sha u Blei ban ieid bad ban tieng burom ia u.
Ha ka nohphai sngi hadien ka jingduwai Mane Sakrament bad ka jinglehburom ia ka Dur u Khunlung Jisu ha ka Shyngoid nangta la pynlong ia ka Carol Khristmas kaba la lamkhmat da ka Kynhun kiba riam Santa Claus, ka riam kaba pynsngewtynnat ia ki nongpeitkai da kaba iaid lyngba ka Iawmusiang, Mission Compound, Iongpiah, Tpep-pale, Wah-nangbah bad pynkut ha Mynchem Parish.
Kum juh na ka liang ka kynhun ki riewngeit Presbyterian ki la rakhe shongshit ia kane ka sngi kynmaw ia ka jingkha ia u Jisu Khrist sha kane ka pyrthei kaba 2025 bad pynlong ia ka jingshad Carol ha kiba bun ki bynta jong ka sor Jowai.
