(File Photo)
U Station Officer ka Ladrymbai Fire Emergency Service Station u JP Sing, haba kren sha ki lad pathai khubor ula ong ba ka kynhun ki Pulit pynlip ding kala ialeh shitom kumba 5 haduh 6 kynta ban tem ia ka ding ba klang kaba la bam ia ki bynta iew jong ka Ladrymbai Dongwah kaba la jia ha ka miet jong ka 27 tarik mynta u bnai (Nohprah) 2025, hadien ka jingioh jingtip ha ka por kumba 8:50 PM. Na ka liang jong une u heh Pulit ula kyntait ruh ia ka jingkynnoh ba poi slem ki kali pynlip ding.
U Singh ula iathuh ba ula ioh jingtip ia kane ka jingjia na ka 112 na Shillong ha ka por 8:50 PM bad mar mar ula phah ia ka kynhun jong u ryngkat bad ki kali pynlip ding sha katei ka jaka ba jia ha Ladrymbai Dongwah. Da lade ruh u la leit poi sha katei ka jaka ba jia ban pyniaid ia ka kam. U la ong ba ba kila don 3 (Lai) tylli ki kali (Truck) pynlip ding kiba na Ladrymbai kila poi mar mar, bud sa kawei na Jowai bad kawei na Dalmia Cement Factory ha kaba la don haduh 5 tylli ki baroh.
U la iathuh ba ia ka ding la lah ban tem hadien ba la pyndonkam da ki JCB ban pynkylluid ia ki jaka ban rung ki kali pynlip ding. Ka jingiakhun ban pynlip duh ia ka ding kala shimpor haduh ka por 2:00 AM, ha kaba la pyndonkam haduh 50,000 litar ka um bad 20 ngut ki Pulit pynlip ding. Halor ka jingkynnoh ba ki kali ki poi slem haduh 30 minit ka long ka bym lah long namar tang hapoh 5 minit na kaba ki ioh jingtip kila poi ha katei ka jaka ba jia ryngkat ki kali kiba la biang um.
U Singh ula iathuh ba na ka liang jong u Waheh Shnong ka Ladrymbai Dongwah ruh u la ai ka jingkhublei ia ka kynhun ki Pulit pynlip ding namar ka jingtrei shitom jong ki.
