Ka Seiñ Raij Jowai kala kynmaw burom ïa ka lyngkhuh snem ïap ba 163 snem u Woh Kiang Nangbah uba dei u Khlawait ka Ri Khadar Dolloi ha Mynkoi Pyrdi Loompyrdi Iongpiah, Jowai naduh ka por 10 shiteng mynstep.
Ha kane ka jingïalang u myntri ka Art and Culture ka sorkar jylla u ma Shanbor Shullai ula long kum u kongsan, haka jingdonlang u President ma Seiñraij ma H. Toi, u President ba rim ka Seiñ Raij ma O. R. Shallam, ka Langdoh ki nongkitkam ka Seiñraij nalor kiwei de.
Na ka liang u Dolloi ka Elaka Jowai ma Puramon Kynjing haba ai jingkren shapang jingim u Kiang Nangbah, la kha ïa u ha Tpep-Pale bad u dei u khynnah ba smat ba sting, u dei u nongrep uba khlaiñ bad uba sngewtynnad ïa ki kam ïalehkai tynrai kum ka dat moo point, rah mookhrah, ïasiat khnam bad kiwei de.
Dei ha ka por ban wan synshar ki pareng hapoh ka Ri Jaiñtia u Kiang Nangbah u dan don tang ha rta kaba hapoh 35 snem, ula shim ïa kane kam nongïalam kum u Khlawait ban ïaleh pyrshah ïa ki bor jong ki phareng da ka bor ba maian Blei kaba ula shimti ha madan madia kmai Blai Syntu Ksiar, ha kaba u Kiang Nangbah ula leit ngam hapoh ka wah Syntu Ksiar bad shim ïa ki tnad dieng kum ka dak jong ka jingïatylli ban ïakhun pyrshah ïa ki phareng.
Ter ter ula pynsngew ïa ka jingim jong u ha ka jingïaleh pyrshah ki phareng bad ki nong Jaiñtia kaba eh bha ban shah pyndem, kumta u Kiang Nangbah ula shah shet kylla pynban ha ki briew la jong ha ka por ba u don haka jingpang bad la kem suk ïa u da kaba rai pynïap ha u tyllai pasi ha Iawmusiang.
Ula kyntu lada ngi ieit ïa ka jaitbynriew ngi dei ban kynmaw ïa u Kiang Nangbah uba dei u Khlawai ka Ri Jaiñtia.
Na ka liang u kongsan ma Shanbor Shullai ha ka jingkren ula kyntu ïa baroh ban long kiba burom ïa ka tynrai la jong da ka ym dei ban klet ïa ka , da kaba pynkynmaw ruh ïa ka jingsarong ba ka sorkar kala ithuh ïa u (L) Kamnel Shullai uba long kum uwei na ki jaitbriew Pnar ban ïoh ïa ka nam scientic kum u nongthaw bad u nongpynwan dur ïa ka khnap thangbriew. Ula pyntip ruh na ka liang ka sorkar lyngba ka tnad Art and Culture kan pynshna ïa u motdur Statue “Kiang Nangbah Square” ha lad Kiang Nangbah Govt College Jowai.
Ha ka juh ka por ula kyntu naduh ki nongïalam ka Seiñraij Jowai, ki kynhun seng bapher bapher bad ki riew shimet ki lah ban phah ïa ki jingthoh jong ki kum ka jingai jingmut sha ka tnad treikam jong u na ka bynta ban leh ïa kaba donkam.
Ha kane ka sngi la pynkum burom ruh ïa ki nongkitkam ñiam kiba la shakri 25 snem shaneng, kumjuh la sam khusnam ïa ki nongjop ha ki jingïalehkai tyngrai naduh ka dat moopoint, rah mookhrah, ïatan tyllai bad ka ïasiat khnam.
Ïa ka jingïalang ha kane ka sngi la pynïaid da u Wansalan E Dhar bad ka kong Warika Sumer, katba ïa ki kyntien ai khublei la ïoh na u General Secreatary ka Seiñraij Jowai ma Arwotki Sumar.
