Hapoh ka jingpyniaid jong ka Kiang Nangbah Iasiat Khnam Memorial Society, Jowai, la pynlong ia ka jingialang kynmaw burom kaba heh ia ka sngi iap kaba 163 snem jong u Woh Kiang Nangbah, u Khla Wait ka ri Jaintia ha Kiang Nangbah Memorial Park, Madiah Kmai Blai, Syntu Ksiar ha kaba u ma Sanbor Shullai MLA ka Laban uba long ruh u Myntri ka Sorkar Meghalaya ba dei peit ia ka Tnat Art and Culture Department .etc u long u kongsan.
Ha shwa ban ioh ia ka jingkren na u Kongsan (Waheh Sanbor Shullai) la ioh ia ka jingkren maitphang bad ka jingkren pdiang burom ia u kongsan bad ia baroh ki nongwan iashim bynta sha kane ka jingkynmaw burom ia ka snem iap kaba 163 snem jong u Woh Kiang Nangbah da u Waheh C. Najiar President jong ka Kiang Nangbah Iasiat Khnam Memorial Society, Jowai.
U Waheh Sanbor Shullai ha shwa ba un ai jingkren kum ka dak ka jingkynmaw burom ia une u Khlawait ka Ri Jaintia, u la leit ban buh syntiew ha ka Dur Mot jong u Woh Kiang Nangbah bad pynher ia ka lama jong ka seng ha ka jingsynran u Pa Doloi Puramon Kynjin, Doloi ka Elaka Jowai bad ki nongkitkam jong ka Kiang Nangbah Iasiat Khnam Memorial Society.
U Kongsan, Waheh Sanbor Shullai haba kren ha kane ka sngi u ong “ Ngam kwah ban kren bun ktien lane kular kane katai, hynrei yn leh da ka kam naba ka kam ka kren khamjam ban ia ka ktien ”Nangta u ong ba un jin da la kwah ban ia don lang bad ki paidbah haduh ba kut ka prokram, hynrei um lah naba ka don sa kawei pat ka prokram kaba ap ia u bad kaba um lah ban kiar bad um kwah ban kren shibun shaphang u Woh Kiang Nangbah namar ba baroh baroh ki la iatip uei une u Kiang Nangbah. U pynkut ia ka jingkren jong u da kaba ai khublei snem thymmai basuk bakmen ia baroh.
U Doloi Jowai (Jwai) uba long u Symbud kongsan ha ka jingkren jong u, u pynpaw ka jingsngewnguh ka bakhraw ia ka Kiang Nangbah Iasiat Khnam Memorial Society ba lada ym don kane ka Society, ym don ba tip ba bna shaphang u Kiang Nangbah bad wat ia kane ka Madan Madiah Kmai Blai, hynrei ka jingdon kane ka Society ym don shuh ki riew shimet kiba kam trai ia kane ka jaka.
Shuh shuh u Doloi u ong ba hadien ka jinglait luid, ka ri India ka la ithuh ia ka jaitbynriew kaba kyrpang da kaba thaw ia ka Sixth Schedule. Nangta u ong wat lada u Woh Kiang Nangbah um don shuh ban ialeh pyrshah ia ka jingsynshar donbor jong ki Phareng, hynrei pat ki Nongbud Nongrap jong u Woh Kiang Nangbah kim shym la kynran na ka jingialeh ban pynlaitluid ia ka jaitbynriew na ka jingsynshar ki Phareng. Ban kyntiew ia ka bha ka miat bad ia ka jingkiew ka jait bynriew ha khmat ka pyrthei, u khot ia ka jigiatreilang bad ka jingiadei jingmut na ka bynta ka bha ka miat ki khun jong ka Ri Jaintia. U Doloi Puramon Kynjin u pynkut ia ka jingkren jong u da kaba ong “Ai ba ka snam ieid ri bad ieid jaitbynriew jong u Woh Kiang Nangbah kan hiar kan tuid ha ki khun jong ka Ri Jaintia”.
Kham ha shwa la ioh ia ka jingkren na ka liang ka Seng da u Waheh Jaitda oo Sumer, Waheh Riquo Rq Laloo, kiba la kren sngewtynnat shaphang ka jingim bad ka jingiaid lynti jong u Woh Kiang Nangbah, u riew ieid ri bad ieid jaitbynriew pyrshah ia ki Phareng. La nangpynbyrngia ia kane ka Programe da ka jingshad tynrai da ki khun samla jong ka Dorbar shnong Panaliar, ka jingrwai na u Ram Shylla, ka jingrwai na u Deiwitewan Synnah, ka jingsam buskit bad kyntang iawai ka jingkren ai khublei da u Waheh R, Syngkon General Secretary ka Seng.
