Ki kynhun seng bapher bapher mynta ka sngi 30 tarik u Nohprah kaba dei ka lyngkhuh sngi ïap ba 163 snem u Woh Kiang Nangbah, kila leit hiar sha Kiang Nangbah Memorial Park Madiah Kmai Blai (Syntu Ksiar) ban leit buh syntiew ha trai jong u mot ‘Kiang Nangbah’ ha ryngkat ki jingnguhblei ïa u Khlawait ka Ri-Lum Jaiñtia.
Kitei ki seng kiba kynthup naduh ka Bouncers Association of Meghalaya (BAM) Jaiñtia Hills District, ka National People’s Youth Front (NPYF) 1-Nartiang, ka Meghalaya Commercial Truck Owner and Drivers Association (MCTODA) Jaiñtia Unit, ki sengbhalang kum ka Jaiñtia Students’ Union (JSU) Central Body, ka Hynñiewtrep Integrated Territorial Organization (HITO) Central Body, ka Jaiñtia Students’ Movement (JSM) Central Body, ka Warjaiñtia Students’ Union (WjSU), ka Jaiñtia Youth Federation (JYF) , ka Hynñiewtrep Border Disputed Redressal Forum (HBDRF), ka Hynñiewtrep Youth Council (HYC), ka Hynñiewtrep National Youth Front (HNYF) Central Body, ka Meghalaya People United Front (MPUF) bad kiwei kiwei de.
Ki katto katne ngut ki nongïalam sengbahlang kila pynsngew ba kane ka sngi ka long kaba kyrpang eh ïa ka jaitbynriew, shi bynta na ka jingrakhe ïaka lyngkhuh sngi ïap ba 163 snem u Khlaiwait ka Rilum Jaiñtia uba la aiti na ka bynta ka jingim ban pynïoh laidluid ïaka Ri na ka jingshah synshar ha ki phareng.
Kila kyntu ruh ïa ki khun ka Ri-Lum Jaiñtia ba ki don ïa kane ka juh ka mynsiem shynrang bad ka jinglen lade kumba long u ‘Kiang Nangbah’ ban ïakhuh pyrshah ïa ki nongshun kiba dei ki bar jylla kiba mut ban wan thombor ïa ka Ri bad ka Baitbynriew ha kine ki sngi ba mynta.
