Mynnin ka miet ha ka por kumba 8:30 pm ei ei ha ka jingpyntip ki paidbah sha ka seng, ba kila iohi ia ar ngut ki Kharbangladesh ba ishan khmat hajan shnong Dona Skur NH6 katba ki dang ap kali, kumta ka KSU-Narpuh Circle ha ka jingialam u President u Phanuel Tongper bad ki dkhot, kila hiar mar mar sha katei ka jaka bad la ioh kem ia kitei ki 2 ngut ki kharbangladesh ryngkat ki note pisa Bangla, kiba wan rung be-aiñ lyngba ki khawpud indo-bangladesh ba don ha shnong Dona Skul.
Ha ka jingtohkit ka seng ia kitei ki 2 ngut kiba shah kem ki kam kyrteng ialade kum u Prasanta Das 17 snem bad Sangato Das 19 snem, kila phla ba ki dei ki hindu Bangladesh kiba sah ha ka shnong Paharpur, Noagoan District Bangladesh. Kila phla shuh shuh ia ki, la wan on ha katei ka jaka da ki 2 ngut ki dalal muslim ba dei na Bangladesh ha ka dor Rs.8500/- kila siew, bad kita ki dalal kila contact ruh ia ki Dalal na India ban wan shaw ia ki na katei ka jaka.
Haba ka seng kala shim ia ki phone number na kiba shah kem jong kita ki dalal India bad call ia ki, kim treh shim ia ka call. Hadien bala dep tohkit bniah, ka seng kala leit aiti ia ki sha Umkiang Police Patrolling Post ba kin leh katkum ka aiñ.
Ka seng ka sngewkhia namar ym don ka aiñ kaba khlaiñ ban pynshitom ia kum kine kiba wan rung beaiñ namar haba ia kren bad u incharge ka Umkiang Police Patrolling Post kila ong ba kin shu shimti bad pynphai (pushback) biang ia kine kiba shah kem sha bangladesh lyngba ki BSF, namar da shu phah sha jail ruh kan shu lut kai ka Sorkar ban bsa ja bsa jhur ia ki bad hadien katto katne bnai hap pynphai biang ia ki sha Bangladesh ka ri jong ki. Namarkata ka seng ka iai dawa barabor ban pyntreikam ia ka ILP kaba pura ym ka ILP kaba shu syriem ne tang ka nam, khnang ban lah ban tehlakam da kaba tyngeh ia kum kine kiba rung beaiñ sha ka jylla bad ban lah ban iada ia ka Jaidbynriew rit paid jong ngi.
