Ka West Jaiñtia District Sports Association (WJDSA) haka kyrwoh khubor bala phah da u Hony. General Secretary ma Lammat-oo Laloo la ong ba ka Association ka kwah ban pynshai halor ka jingïakhun 1″ Semi Final hapdeng ka Khimusniang SC pyrshah ïa ka Demthring S.C haka 5 tarik u Nohprah, 2025 ïa ka jingïalehkai la pynïaid da u Bulmi Phawa National Referee AIFF.
Hadien bala kut ka jingïalehkai ka Demthring S.C lyngba u Coach, Manager bad ki Players kim hun satia ïa ka rukom pynïaid u Referee, kumta kiba leit tur da ka jingïadom haduh ba ki paidbah ruh kila ïoh lad ban rung shapoh madan lyngba ka gate kaba khang ban rung shapoh madan.
Kala don ruh ka jingkren ïa ki ktein khlem akor na u Coach, Manager bad na ki Players. Kumta na ka liang u Referee ula hap ban rah ïa ka card na ka bynta ka jingbun palat ki paidbah ba rung shapoh madan.
Da kaba kdew ruh ïa ka Constitution Article No. 5 (a), ha kaba ki Club baroh ki dei ban ïatrei lang ban pynkiew ïa ka kam ïalehkai Sports hapoh ka District jong ka West Jaiñtia Hills.
La ong ruh ba wat ïa ka jingkhang jong ka Gate ban rung shapoh, la mana lyngba ka jingthoh bala shah tang ïa ki official, Executive Member bad ki nongshah khot sngewbha kaba long katkum ka Article No. 12.
Halor ka jingbymhun jong ki ïa ka rukom pynïaid u Referee, ka Association kala kdew ïa ka Football rule No. (15) ym kumba la kynnoh ba shah pynbam pisa ka Association.
La kdew ïa ka Rule No (16) ka dei ka bor jong u Referee ban shim ïa ka rai ba khadduh (final) haka jingïakhun ban rai ïa kano kano ka kynhun kaba jop hadien ba kut ka por ïakhun bad kumjuh ïa ka Rule No. (17).
Haka jingïadei bad ka jingong ka Demthring SC ban postpone ïaka Semi Final ha ka 09/12/2025. Ka Executive Council kala shong jingïalang ha ka 08/12/2025 bad la ïoh ban pule ïa ka report u Referees, katkam ka Football rule no. (23) (h).
Da kaba kdew ruh ïa ka kyndon ha ka sien kaba nyngkong, ka Club kaba pynkheiñ ïa ki kyndon aiñ kan hap ban siew ïa ka kuna kaba Rs. 30,000/- (laiphew hajar) tang. Lada ka Club ka leh biang ïa kajuh ha ka sien kaba ar, kan hap ban siew ïa ka kuna kaba Rs. 60,000/- (Hynriewphew hajar) bad lada ka Club ka pynbud biang ha ka sien kaba lai, kan hap ban siew ïa ka kuna kaba Rs. 1,00,000/- (shi lak) bad lada ka Club kam kohnguh ïa kane ka hap ban shah pynduh noh shi syndon.
Ka Executive Council kala ïoh pdiang ruh ïa ka report lyngba u Secretary Referees Committee kaba ong baroh ki Referees kim treh shuh ban pynïaid ïa ka Semi Final haka 09/12/2025, namar ka jingdon ki Player kiba pynkheiñ aiň.
Kumta ka Executive Council kala postpone shwa ïa ka Semi Final ha ka 09/12/2025 bad ïa ka Final haka 13/12/2025, katba ym pat ïoh da kumwei pat ka rai, hynrei kaba sngewsih ha ka jingïaid lynti la mih syndon ka jingshah summon ïa ka Executive Council na u Magistrate G.H. Passah, ha ka 17/12/2025 haka por 01:00 Pm ha Conference Room, DC office ha ryngkat ka Demthring SC.
Shuh shuh ha ka jingïalang kila ïakren shibun ki kam kiba ïaidbeit katkum ka Constitution bad ka Football rule, namar ka Demthing ka kwah ban pynlait noh ïa ka na ka jingshah suspend jong ki official bad ki Players bad ban dawa rematch ïa ka jingïakhuh bad ka Ladthalaboh SC, kiba la dep ban ïakhun ïa ka 3rd Semi Final (15/12/2025) bad ka Ladthalaboh, ha kaba ka Demthring kala shah thep haduh 9 kol, namar ki player jong ka kila shu ïeng beit ha madan haduh ba kut ka por ïakhun.
Hynrei katkum ka jingthoh bala ïoh pdiang da ka Association na u Magistrate G.H. Passah, hadien ka jingïakren kam ïadei katkum ka jingïakren ha ka jingïalang haka 17/12/2025, da kaba pynpaw ba ki dkhot kim lah ban rai tang ar ngut, hynrei katkum ka rai la pynsngew ba kila ïabeit lang nalor ba ki dkhot ka Association kim shem la hun.
Hashwa ban pynlong ïa ka Final hapdeng ka Ladthalaboh bad ka Khimusniang haka 22 tarik u Nohprah la khot biang ïa ka Association ban ïakren hynrei kam poi shano shano ruh, ha kaba u Magistrate ula rai ban phah ïa kane sha u khliehduh ka District u Deputy Commissioner, hynrei katba u ap haduh ka por janmiet u Hony. General Secretary ula phah ïa Whatapps cha u Magistrate lada kim ïoh ïa ka order haduh ka por janmiet kin ham ban pynïaid beit ïaka Final namar ka lah ban buh jingeh ïa ki Club ban ïakhun Final bad ban pynkut hapoh ka por.
Hynrei ym slem shuh ka Association kala ïoh hukum bala phah pynsangeh shwa ïa ka Final haduh ban da dep ka enquiry ïa kane ka kam.
Da kaba pynpaw lada ki bor District kin wan ban tuklar ïa ka kam Sports kaba la pynïaid katkum ki rule ka Association, la ong shano yn poi ka District, da kaba ong ruh ba ka Demthring SC kala kot 30 snem tam ka jingïashim bynta jong ka bad ka Association.
Katkum ka Constitution (10) (g) kala kren shai ïa baroh ki Affiliated Club, Members, Office Bearers ne ki Player kiba ïaidlaid ïa ki kyndon, kala long kumba pynkheiñ ïa ka rai jong Executive Council bad ki lah ruh ban shah weng na ka Association bad kim lah shuh ban ïadon bynta lang bad ka Association.
La pynshai ruh katkum ka jingkylli na u Magistrate ba kim ïaid katkum ka rukom ka Association, da kaba ong ba ka Yellow Card ka long kum ka warning bad lada ïoh double Yellow Card la pynsangeh noh ïa u Player naka bynta shi game bad ka jingsuspend ïa ka Demthriang ka long katkum ka procedure.
La kyrpad ïa ka District Administration ba kan pynkut noh ïa kane ka kam katkum ka Constitution bad ka Football Rule ka Association, la pynkut ka kyrwoh na u Hony. General Secretary West Jaiñtia District Sports Association, Jowai.
