Ki pulit jong ka Khliehriat PS, hadien ba kila ioh ia ka jingpyntip kaba thikna, halor ka jingdon jong ki briew kiba rah ia ki jingdih pynbuaid, kiba iaid lynti lyngba u surok bah NH:6, kumta kila pynlong ia ka jingpynap shrip ha Khliehriat.
Ha kane ka jingpynap shrip ki pulit kila ioh bat ia u briew ba la tip kyrteng u Kheinkor Muliar ba ju khot u Khein 23 snem ka rta na ka shnong Mookympad, East Jaiñtia, katba u dang ñiah ia ka kali kaba don ia u number ML06A 0621.
Ha ka jingkhynra jong ki pulit ha ryngkat ki nongsakhi, kila ioh ban kurup ia kawei ka khop plastic pond kaba don ia ki kynja powder ba long rong sohniamtra (orange) ia uba la suba ba dei u drok Heroin, kawei ka tyndong duma Golden kaba thylli, 25 tylli ki thyrnia injek. Ki pulit ki la bat ruh ia katei ka kali Alto rong lieh kaba u ñiah.
Ka khubor pulit ka iathuh ba hadien ba la dep ban pynlong ia ka test ia utei u powder la lap ba u dei u drok Heroin, uba khia 1.37 gms. La iathuh ruh ba une u Khein u donkti ha kaba die drok ha ki bynta jong ka iew Soo Kilo bad ki thaiñ ba marjan ha East Jaiñtia.
Ia une u samla la kem bad la register case pyrshah ia u katkum ki kyndon jong ka NDPS Act bad ka jingtohkit ia u ka dang iaid shakhmat.
