Ka Meghalaya State Council of Contractor & Supplier Association (MSCCSA) kaba dang shu shu mih shen ka la pynbna ba kan pynlong Ia ka General Meeting ha ka 16 tarik Kyllalyngkot 2026 ha ka por 2 baje ha Bharat Scout & Guide Hall Shillong.
Haba kren sha ki lad pathai khubor u Assistant Secretary ka MSCCSA u Bah Churchill Syiemlieh u la pyntip ba ka kynhun kan pynlong ia ka General Meeting ha ka 16 tarik Kyllalyngkot 2026 bad khmih lynti ba ki Contractor na kylleng ka Khasi Jaintia & Garo kiba don ha kane ka kynhun kin wan sha kane ka jingialang ba la khot da ka Meghalaya State Council of Contractor & Supplier Association bad ia ki kam bad ki mat yn sa pynshai ha ka jingialang ka ban sa long ha ka 16 tarik Kyllalyngkot 2026 ha Bharat Scout & Guide Hall Shillong.
Na ka liang u Secretary ka kynhun u Bah Rofello Khongwar u la ong ba kane ka dei seng ki Contractor kaba dang thymmai kaba la seng ha ki snem ba la leit noh bad ka jingmih kane ka Association ka long haba iadei bad ka khia ka shon jong ki Contractor khamtam ha ka ioh kam ioh jam bad ka sorkar kam phai khmat bad kam ju don ruh kita ki nongiarap ban wan ban iarap ia ka khia ka shon ki Contractor ha ka jingkynduh jingeh na ka por sha ka por.
Nalor kata u la ong ka jingmih kane ka Association ka dei kum shi bynta ban ia kit ia ka khia ka shon jong uwei pa uwei u Contractor ba iakynduh jingeh hapoh ka jylla.
Shuh shuh u la ong katba nang mih ki snem ban trei ia ka kam Contractor ka la eh shisha haba phai sha ka ioh kam ioh jam, ka jingbym pyllait ia ki bill, bad halor ka jingbym lah ka sorkar ban phiah ia ki kam haba iadei bad ka ioh kam ioh jam jong baroh ki Contractor naduh kiba rit kiba trei ia ki Class 3, Class 2, bad Class 1 ruh kumjuh. U la ong ki Contractor ki shu register bad ka Sorkar bad ki pyllut kai ia ka pisa ban renew ia ka Contract License bad ka Sorkar khlem da ioh ia ki kam ki jam.
