Ki paidbah nongshong shnong jong ka Kyrwen, Madan Rwan,Ynniawkmai hynne ka sngi 12 tarik Kylla-Lyngkot 2026 ki la iamih paidbah ban pyrshah ia ka jingshna ia ka Sub-Health Centre ha shnong Mynksan bad dawa ban shna ha ka jaka ba long pdeng jong ki San shnong kiba kynthup ia ka Mynksan, Ionglang, Kyrwen, Madan Rwan bad Ynniewkmai.
Kane ka Sub-Health Centre kaba la pyntrei mynta ka hap hapoh u pud u sam jong ka shnong Mynksan, hynrei ka sur jong u paidbah nongshongshnong na Madan Rwan, Kyrwen bad Ynniawkmai ba kane ka Sub-Health Centre kam shym la long pdeng ia ki san shnong bad kaba long pdeng ka dei ha ka shnong “SLARUIN”. La ong ba kane ka shnong Slaruin ka don harud ka surok Raliang-Sahsniang bad kaba long pdeng ia ki san tylli ki shnong naduh Madan Rwan, Kyrwen, Ynniawkmai, Ionglang bad Mynksan.
Ka sur ki spah ngut ki Nongiaid Rally, kiba kynthup ia ka Rangbah, ki Samla, ki Longkmie, ki Khyllood kiba la ia mih na la ki shnong sha kane ka jaka kaba la shna ia kane ka Sub-Health Centre bad kiba ialang Mlun ha mynchem kane ka Sub-Health Centre kaba don hapoh u pud shnong jong ka shnong Mynksan, da kawei ka sur ki Pyrta “Kynriah iakane ka Sub-Health Centre nangne bad shna ha Slaruin ka jaka kaba long pdeng ia ki san shnong na ka bynta ka jingmyntoi ki paidbah nongshongshnong jong ki san shnong bad kiwei de ki shnong kiba mrjan”.
Ka Rally Paidbah kala dawa pynkynriah ia kane ka Sub-Health Centre kaba la sdang tei ha Mynksan (hapoh u pud shnong jong ka) ka long kaba jai-jai, la katta na ka liang ki bor jong ka Aiñ kiba peit ia ka shongsuk shongshngaiñ ba kan ym mih kano kano ka jingkulmar, ki la pynbiang ia ki Pulit Pahara.
U Waheh shnong ka Kyrwen Waheh Wankhana Suchiang, u Waheh shnong ka Madan Rwan Waheh Headlang Lapasam bad kiwei de ki Rangbah haba kren ha U Yutip, ki ong “Ngi kum ki Waheh shnong bad ki paidbah ngi wan hangne ym ban shna jingkulmar, hynrei ngi wan ban pyni pyrthei ba ngi kwah ba kane ka Sub-Health Centre yn pynkynriah nangne bad shna ha Slaruin ka jaka kaba long pdeng ia baroh ki san shnong ban wan shim dawai khamtam ki kynthei ki khynnah bad ki longkmie kiba armet bad kaba don harud u surok Sahshniang Raliang ka ban pynsuk ruh ia ki nongleit nongwan ban wan shim dawai na kane ka Sub-Health Centre.
Ha kane ka sngi na ka liang ki bor District jong ka West Jaintia Hills, la wan mihkhmat da u Magistrate ma P. Passah. Ki jingiakren ki long kiba jai-jai bad kiba ia sngap ia ka jingia aijingmut markylliang. Na ki jingiakren la sngewthuh ba ia kumba long mynta ia kane ka jingtrei yn pynsangeh shwa ban pyntrei tat hadien ka jingialang kaba yn sa khot kyrpang ka ban sa long shen ha D.C. ophis ha Jowai.
Ha kane ka sngi na ka liang ki paidbah kiba iaid rally ban pynkynriah ia kane ka Sub-Health Centre na ka jaka kaba la tei mynta, ki la ap ia u Waheh shnong Mynksan ba un wan pynshai ia ka jingshna ia kane ka Sub-health Centre bad hadien shikynta da ka jingsynran ki Pulit u la wan mih bad ia kynduh ia ki paidbah kiba pyrshah ia ka jingshna ia ka Sub-Health Centre kaba don hapoh u pud u sam ka shnong Mynksan bad dawa ban pynkynriah ne shna ha Slaruin ka jaka kaba long pdeng ia baroh.
