U Working President jong ka North East Kickboxing Association u Samla Samuel Hashah u la pyntip ba All Meghalaya Kick boxing Association kan pynlong ia ka 4th North East Kicboxing Championship ha nongbah Shillong ha Bharat Scout & Guide Shillong naduh ka 29 tarik Kyllalyngkot haduh 31 tarik Kyllalyngkot 2026.
Haba kren bad ki lad pathai khubor ha Shillong Press Club u Working President ka North East Kicboxing Association u la pyntip ba ki jylla kiba ban wan iashim bynta sha kane ka lympung kin kynthup ia ka jylla Assam, Sikkim, Mizoram, Manipur, Nagaland Arunachal Pradesh kynthup ia ka jylla Meghalaya.
Nalor kata u la pyntip ba ka kynhun ka khmih lynti ia palat 600 ngut ki nongwan iashim bynta ha kane ka jingialehkai Kicboxing ka ban sa long ha nongbah Shillong.
Shuh shuh u la ong ia ki jingialehkai yn phiah ha ki kyrdan bapher bapher ba kynthup ia ki Tiny Tots, Sub-Junior, Junior, bad Senior, na ka bynta ki shynrang bad kynthei.
U Hashah u la pyntip kane ka jingialehkai yn jied ruh ia ki khynnah ialehkai kiba tbit ki ban mihkhmat ia ka jylla bad kumjuh ia ka India sha kiwei ki ri ha ka jingialehkai Kickboxing.
Haba ban jur ïa ka jingïatylli hapdeng ki nongïalehkai ka thaiñ Shatei Lammihngi, u Hashah u la ong ba kane ka lympung ïalehkai ka thmu ban pynkhlaiñ ïa ka jingïadei shipara bad ka jingïatreilang hapdeng ki nongïalehkai kickbox na ki jylla bapher bapher. U la kubur ruh ïa ka jingbym don ki nongkyrshan kiba heh hynrei u la pynpaw ka jingsngewnguh ïa ki nongkyrshan kiba la wan shakhmat ban ïarap ban pynlong ïa kane ka jingïalehkai ban kyntiew ia ka sap ialehkai ki khynnah ha ka jingialehkai Kick boxing.
U la kyrpad ia ka sorkar, ki nongkyrshan, bad ki nongshong shnong kiba ieit ia ka jingialehkai ba kin ai jingkyrshan ban pynlong ia kane ka jingialehkai kaba jop kaba khraw bad ban iarap ban kyntiew ia ka jingialehkai kickboxing
