Ka Hynñiewtrep Integrated Territorial Organisation (HITO) Jaintia Hills mynta ka sngi ka 13/01/2026 hopoh ka jingialam u President u bah Burom Dkhar, ka la leit buh Dorkhas ha u DC ka West Jaintia Hills District. Hynrei na ka daw ba u DC ym don ha kane ka sngi kumta ka seng ka la leit ban aiti ia kane ka Dorkhas lyngba ka Additional DC kong B. Blah ban dawa pynduh noh ia ka Bai lum Toll Plaza ia ki trai kali ML-04 kaba don ha 7mer ba hap hapoh ka shnong Ialong.
Na ka liang ka seng ka pynpaw ba katkum ki kyndon ka National Highways Fee Rules 2008, kiba dei khmih jong katei ka Toll Plaza kim lah ban shim Pisa ia ki kali ba leit lyngba u ne u surok NH-6 hapoh ka 20 km. Kumta ka seng ka dawa na u DC ban pyllait noh ia ki kali kiba register ML-04.
Ka seng ka iohi ia ka jingshahktah jong kine ki shnong ba Marjan kum ka Kyndong Tuber, Mynso, Muthlong Phramer, Shangpung, Jowai bad kiwei kiwei ki shong hapoh ka West jaintia Hills District kiba leit iew leit hat, leit khaii pateng, kiba leit shim dawai bad ba leit Trei office manla ka sngi.
Ka seng kala ong ruh ba ia ki kali ML-04 ki hap ban lait beit na ka jingsiew ha katei ka Toll Plaza namar ba kidei ki Local jong ka tei ka District, kum ka Ribhoi ka pyllait ia ki kali ML-10. La Kyntu ruh ia ki Trai kali badon ia u Registration ML-04 ba kim dei ban siew lada kine ki Trai Toll Plaza kim pyllait iaki kamut ki iohroit ia ka hok jong ki paidbah bad ka seng ka kyntu ia ki paidbah ban pyntip sha ka seng bad ka seng kan sa pyrkhat pat da kawei ka seiñjam.
