Ka Seng Hynniewtrep National Youth Front, South East Sohra Circle ha ka 13 tarik Kyllalyngkot 2026 ka la wan iakynduh ia u CEM ka KHADC U Bah Winston Tony Lyngdoh haba iadei bad ka jingioh trading license ka Agency ba na bar ba la tip kum ka North East Security Service ban pyniaid ia ka kam Security ha NIT Sohra.
Haba kren sha ki lad pathai khubor na ka liang u Nongaiktien ka HNYF South East Sohra Circle u Samla Banjop Khongwir u la pyntip ba na ka liang u CEM ka KHADC u Bah Winston Tony Lyngdoh u la pynshai sha ka Seng ba kane ka jingai trading license ia ka Agency North East Security Service ka dei ha Laitkor Air Force Station, Laitkor Peak kam dei ha NIT Sohra bad kane ka Agency ka la leh thok bad pyndonkam bakla ha NIT Sohra ban ioh pyniaid ïa ka kam Pahara ha NIT Sohra.
Nalor kata u la ong ba ka Seng ka la shim ia ka rai ban pynduh pyndam noh ia ka North East Security Service Agency na ka NIT Sohra.
Shuh shuh u la ong ba ka Seng kan sa leit kynduh ruh ia u Director ka NIT ban pan jingshai la ki don ne em ki Agency kiba dei ki trai jylla kiba apply ha katei ka jaka pule bad lada don u Director u dei ban plie biang da kawei ka tender namar ka Agency NESS ka la leh thok lyngba ka trading license bad dei ban plie biang ia ka tender bad ki agency trai jylla kiba la tbit kin ioh ban pyniaid ia ka kam pahara ha katei ka jaka pule.
Khatduh u la ong ba ka Seng ka ai khublei ia ka Elaka Saitsohpen kaba la ieng lang ha ka juh ka sur halor ka jingiaid lait kane ka Agency kaba na bar jylla ka North East Security Service Agency na ka Elaka khlem da ioh ia ka NOC na ka Shnong bad ka Shnong ruh kan ieng lang ha ka juh ka nongrim bad ka Seng ban pynduh pyndam noh ia katei ka Agency nabar kaba pyniaid kam pahara ha NIT Sohra.
