Ka Meghalaya State Council of Contractor & Supplier Association ha ka 16 tarik Kyllalyngkot 2026 ka la pynlong ia ka jingialang ha Bharat Scout & Guide Hall Shillong.
Ha kane ka sngi ki Contractor na kylleng ki district ba kynthup na East Khasi Hills, Jaintia Hills West Khasi Hills ki la wan iashim bynta ha kane ka jingialang ban iakren halor ki mat kiba ki Contractor ki iakynduh na ka por sha ka por.
Haba kren sha ki lad pathai khubor hadien ba la wai ka jingialang u General Secretary kane ka kynhun u Bah Refello Khongwar u la ong ka Kynhun ka la ioh ban iathir iatai bad iakren ia shibun tylli ki mat haba iadei bad ki kam ha ka jylla ba kynthup naduh ka jingphiah ia ki kam ban trei ki Kontraktor.
Nalor kata u la ong ba ka Kynhun ka la iakren ruh halor ka trading license bad ka Kynhun kan sa leit kynduh ia u Cem ka Khadc District Council ban pynmih noh da ka jingpybna halor ka jingpyntreikam ia ka trading License.
Shuh shuh u la ong ka Kynhun ka la ioh ban iakren halor ka jingai Registration ia ki Kontraktor ba ki tnad sorkar jylla ki dei ban leh ha ka rukom ba dei hynrei mynta la shu ai pathar Class 1 Kontraktor da ka hukum jong no re jong no bad kum kine baroh kam dei ban don shuh ha ki tnad bapher bapher jong ka Sorkar.
