[File Photo]
Mynta ka sngi ki ar ngut ki President jong ki ar ri kiba dang don ka thma kata u President ka Russia u Vladimir Putin bad u President jong ka Ukraine u Volodymyr Zelensky kila soi ia ka soskular na ka bynta ban maramot ia ka jaka pynmih bording jong ka Ukraine kaba la shah pynjulor na ka jinghiarthma ka Russia. Ia kane ka jingiasoi soskular ym shym la ai jingtip ei ei sha u President ka Amerika u Donald Trump wat la u long uwei na kiba don bynta ban pyrshang wanrah jingsuk hapdeng kine ki ar ri.
Katkum ka khubor na ka International Atomic Energy Agency (IAEA) ka la pyntip ba ki ar ri kila soi ia ka soskular ban ioh pynbha ia ka jaka pynmih bor ding ha Zaporizhzhia, kaba dei ka jaka pynmih bor ding nuclear kaba heh tam ha Europe. Kane ka jingiatehktien kala ailad ia ki riewstad ban trei pynbha bad maramot ia u lain bording heh (Power line) uba la shah pynjulor na ka jingshah ther bomb ha ki bynta ba marjan bad kane ka jaka pynmih bording nuclear.
La pyntip ba ka don ka jingsheptieng kaba khraw na ka jingktah jong ki bor nuclear, bad ka jingshah ktah jong kane ka jaka pynmih bor ding kan sa ktah ia kiba bun ki bynta jong ka ri Europe ha ka jingsam bording.
Ka khubor sorkar napoh Kyiv kaba dei ka nongbah jong ka Ukraine kala iathuh ba la bthah ia ki nongshong shnong ban kynriah jaka noh shawei. Kane ka jingkynriah jaka kam dei na ka jingsheptieng ia ka jingshahhiar thma, hynrei ka dei na ka jingduna ka jingioh bor ding (Electricity) kaba la ktah bha ia ki nongshong shnong namar ka jingjur palat jong ka jingkhriat kaba la hiar shaduh ka -17 degree Celsius.
