Ki Pulit jong ka West Jaintia Hills District lyngba ka ophis jong u Superintendent of Police kila ai ka jingpyntip sha ki nongshong shnong jong ka West Jaintia Hills District khamtam ia kito kiba don ia ki kali ar shaka la ki dei ki motor bike lane ki scooty ba ki dei ban long kiba husiar bad set bha ha ki jaka ba shngaiñ ia ki kali jong ki khnang ban lait na ka jingshah rong tuh ha ki runar.
Ka khubor Pulit ka iathuh ba tang ha kine ki shisnem tam kata naduh ka 1 tarik u Kyllalyngkot 2025 haduh mynta ka sngi (18/01/2026) kila don haduh 41 tylli ki jingujor kiba iadei bad ka jingshahtuh ki kali ar shaka ba la pyntip sha ki Pulit ka West Jaintia Hills District. Napdeng kine 37 tylli la register case bad ha ka jingtreishitom jong ki Pulit la ioh ban kurup ia baroi kitei ki 37 tylli ki kali ar shaka bad la aiti sha kiba dei trai hadien ba la dep ban pynshisha ia ka jinglongtrai jong ki.
Ha kaba iadei bad kane ki Pulit kila ioh ruh ban kem haduh 19 ngut ki runar kiba don kti ban rong tuh ia kine ki kali ar shaka.
Na ka liang ki Pulit kila kyntu ne bthah ia ki paidbah kiba don ia ki kali ar shaka ba ki dei ban pynieng ia ki kali ar shaka jong ki tang ha kito ki jaka ba la shah ne ai bor, ki jaka ba long shngaiñ bad ki jaka ba don ki jingshai kiba biang. La bthah ruh ban pyndonkam ia u Steering Lock bad lada lah dei ruh ban pyndait lang bad ki tiar jingiada kum ki GPS. Lada don kano kano ka jingshah rong tuh ki kali ar shaka lane ka jingsuba iano iano ki paidbah ki dei ban pyntip mar mar sha ki Police Station ba marjan lane phone ha u number 112.
