Ka Sein̈-kyntu Sein̈-raij 12 Daloi kan sa pynlong iaka lympung kaba 29 mynta u snem ha ka shnong Nongtalang kaba hap hapoh ka Amlarem Sub-division West Jaiñtia Hills District kaba jngai kumba 16 km na Amlarem bad 42 km na Jowai, haka 24 tarik bad 25 tarik mynta u bnai (Kyllalyngkot) 2026, ha ryngkat ka jingiatrei lang ka Sein̈-raij Nongtalang.
Kumta na ka liang jong ka sein̈-raij Nongtalang ka khot ka wer sngewbha ia baroh ki nongialam Sein̈-raij bapher bapher bad kumjuh ruh ka khot sngewbha ia baroh ki Daloi ki Pator, ki Langdoh niam na ki raij bapher bapher ba kin wan sha kane ka lympung.
Ka Sein̈raij Nongtalang ka khot sngewbha kyrpang khamtam ruh ia ki Khun ka bri u hynn̈iew trep hynn̈iew skum ri 12 daloi 30 syiem baroh ban shakhi ia kane ka lympung.
Ka Sein̈-raij Nongtalang haka juh ka por ka khot ka wer sngewbha ia baroh lang ki para niam kiba najan bad najngai ban wan ia shim bynta sha kane ka lympung khnang ban long kaba iphuh iphieng bad kaba jop.
Ha kane ka lympung kan don ki jingshad tynrai (Cultural Dance) bad ki jingsneng jingkraw na ki riew rangbah ban pynneh pynsah ia ka niam ka rukom bad ka riti ka dustur.
