-U riewkhraw bym pat ioh ia ka jingithuh u la ioh ia ka khusnam Padma Shri na ka bynta ka jingkhyllie im biang ia ka rukom jong ki Khasi ban shna jingkieng da ki thied dieng-
U Bah Hally War na ka shnong Siej, Sohra, u la ioh ia ka khusnam Padma Shri Award 2026 na ka bynta ka jingnoh synniang jong u sha ki kam na ka bynta ka imlang sahlang bad ka jingpynneh ia ka mariang, khamtam ha kaba iadei bad ka jingkyntiew ia ki jaka khlaw bad ka jingpynneh ia ki rukom treikam ba tynrai.
Kum u briew uba don ka jingnang jingstad tynrai hynrei u bym pat ioh ia ka jingithuh, u la ioh ia ka khusnam Padma Shri na ka bynta ka jingnoh synniang jong u ban pynneh bad kyntiew ia ki kam bioengineering tynrai jong ki jaitbynriew Khasi. Lyngba ka jingtrei jong u baroh shi jingim na ka bynta ka jingthaiñ ia ki tynrai dieng ban shna ia ki jingkieng ha East Khasi Hills, u la pynneh ia ka rukom treikam kaba hyndai bad u la pynkhlaiñ ia ki jingiadei ha ka imlang sahlang, ban kyntiew ia ka bor jong ka mariang ban iaineh bad kyntiew ia ka kam jngohkai kaba lah ban iaineh. Da kaba ai jinghikai ia ki longïing ha kane ka jaka ha kaba iadei bad ka jingthaiñ ia kine ki jait jingkieng bad ka jingsumar ia ka mariang, ki kam jong u ki long ka nuksa jong ka jingiaid ryntih lang jong ka kolshor, ka imlang sahlang bad ka mariang.
U Bah Hally War u dei u nongrep uba rep ia ki kwai, tympew, sohmarit bad ki jait soh bapher bapher katba u dang bteng ban trei kum u nongsumar ia ka mariang bad ka jingnang jingstad tynrai.
Haba pynpaw ka jingsngewnguh jong u halor ka jingioh ia kane ka khusnam, u Bah Hally War u la ong, “Kum u nongrep kwai, tympew, sohmarit bad ki ki jait soh bapher bapher, ha kaba nyngkong nga ai jingsngewnguh ia u Blei uba la plie lad ia nga ban pdiang ia kane ka khusnam. Nga dap da ka jingkmen bad ka jingsngewnguh ia ki briew kiba la jied ia nga ban ioh ia kane ka khusnam.”
Lyngba ki kam ba iaineh ban kyntiew ia ki jaka khlaw kiba don nongrim ha ki jingnang jingstad tynrai, u la noh synniang bha sha ka jingiaineh jong ka mariang bad ka bha ka miat jong ka imlang sahlang. Ki kam jong u ki long ka nuksa jong ka jingnang jingstad tynrai kaba kyrshan ia ki jingdonkam jong ka mariang ha ka juk mynta.
Ka khusnam Padma Awards – ka dei kawei na ki khusnam ba halor tam ba ai ia ki briew ha kane ka ri, ki dei kiba la ai ha ki lai tylli ki thup, Padma Vibhushan, Padma Bhushan bad Padma Shri. Ia kine ki khusnam la ai na ka bynta ki kam bapher bapher kum ka jingsaiñdur, ka kam na ka bynta ka imlang sahlang, ki kam paidbah, ki kam saian bad engineering, ka kam khaii pateng bad ki kam karkhana, ki kam ai jingsumar, ka thoh katar bad ka kam ai jinghikai, ki kam ialehkai, bad kiwei kiwei.
Ia kine ki khusnam la ai da ka President jong ka ri India ha ki jingialang ba long ha Rashtrapati Bhawan ha u bnai Lber / Iaiong man u snem. Na ka bynta u snem 2026, ka President ka la mynjur ia ka jingai haduh 131 tylli ki khusnam Padma ba kynthup 2 tylli ki khusnam ba iasam lang (ha kaba ia ka khusnam la kheiñ lang kum kawei). Ka thup ka long 5 tylli ki Padma Vibhushan, 13 Padma Bhushan bad 113 Padma Shri ki khusnam. Na kine 19 ngut na ki nongioh khusnam ki dei ki longkmie bad ka thup ka don ruh 6 ngut ki briew na ka thup jong ki briew ba nabar ri / NRI / PIO / OCI bad 16 tylli ki khusnam ba la ai ia ki nongjop kiba la khlad noh.
