Ka Business Advisory Committee (BAC) jong ka Meghalaya Legislative Assembly kaba la ia kynduh mynta ka sngi (28/01/2026) kala shim ia ka rai ban pynlong ia ka Budget Session jong ka Meghalaya Legislative Assembly ka ban sdang naduh ka 16 tarik u Rymphang bad pynkut pat ha ka 27 tarik u Rymphang, 2026.
Ia ka jingialang la pyniaid da u Shongknor jong ka Meghalaya Legislative Assembly u Thomas A. Sangma, la iadonlang ha kane ka jingialang da u Deputy Chief Minister ba dei peit ia ka Parliamentary Affairs u bah Prestone Tynsong.
Katba u Nongialam Liang pyrshah u Dr. Mukul Sangma bad u bah Paul Lyngdoh kila iashim bynta da ka online.
Kiwei de kiba iadon bynta ha ka jingialang ki kynthup ia u bah Cyril V. Darlong Diengdoh, Commissioner & Secretary, Parliamentary Affairs Department, u Dr. Andrew Simons, Commissioner & Secretary, Meghalaya Legislative Assembly, bad u Malthus S. Sangma, Secretary, Meghalaya Legislative Assembly.
Haba kreh sha ki lad pathai khubor u Shongknor ula iathuh ba kane ka Dorbar Mangtyngka ba Shiphew sngi kan kynthup Hynniew sngi yn iakren ia ki Government Business bad Lai sngi na ka bynta ka Private Members’ Business. Ula pyntip shuh shuh ba ia ka State Budget yn wan rah ha ka 20 tarik u Rymphang 2026.
U Shongknor ula ong shuh shuh ba ia kane ka jingshong Dorbar lah ban pynjlan shuh shuh lada i donkam na ka bynta ka jingiohlad jong ki dkhot ka ïing ban iakren halor ki mat ban sa wanrah. U la ong ruh ba ha ka sngi ba wanrah ia ki Supplementary Demand for Grants ia ka jingshong Dorbar yn pynjlan haduh ka por 3:00 janmiet.
